從攀石場到世界賽｜珊山來詞

By editor, 01 August, 2025

從攀石場到世界賽｜珊山來詞

在香港這個沒有雪、沒有冰的城市，成為一位冰雪攀登運動員，聽起來是遙不可及的事。但我偏偏，就是那個把那段距離拉近的人。

十七歲那年，我參加童軍交流團，遠赴加拿大 Mt. Baker。第一次用冰斧攀冰牆、在雪地搭營求生，彷彿整個人被雪山喚醒。那是一種好清澈、好純粹的感覺。空氣又凍又薄，世界變得安靜，變得好大，對比住在香港這個城市，簡直是天淵之別。而我開始問自己：可以走得幾遠？

但夢想與現實之間，有時差了十萬公里。返到香港，雪山變成健身室，冰斧變成啞鈴。二十一歲時，一位曾跟我上山的教練鼓勵我試試參加世界賽。那時我哋冇教練，只有自己埋頭苦幹做一堆唔知有冇用的訓練。憑著一腔熱血，用同一句話不斷提醒自己：「只要選咗條路，就唔好行返轉頭。」

香港冇冰場，我就自己操體能。收工後趕去健身室，引體上升、掌上壓、核心訓練、跑十公里，之後再去攀石牆，直到凌晨場地關門。攀登總會對運動員的體能要求較高——以女運動員標準，需要做到：20次引體上升、70次掌上壓、單槓鎖手踭垂吊兩分鐘。最初我連五下引體都做唔到，只能每日迫自己練到極限。每天做一百下引體上升，變成家常便飯。

場地唔夠，我就去攀石場模擬動作；冇裝備，就用最基本工具練習。用TRX帶練倒吊動作，練那些平時用唔到的細肌肉。我接觸健身室的啞鈴，比冰斧還要多。第一次比賽，我在速度賽中排第二十一。不算頂尖，但對我嚟講意義重大——喺呢啲條件下都可以代表香港出賽，證明理想唔只係一場經歷，而係一條你可以踏實行落去的路。

當時我仍然在公立醫院做護士，要輪班工作。每日返工前或者收工後都會去練習。旅費、裝備、訓練費用全部自資。沒有人保證成功，但我知道——這是我自己選的。

隨後是花時間研究比賽影片，分析選手動作與節奏，解讀攀爬路線的設計。冰攀唔止講力量與技巧，更講節奏、判斷與自我掌握。每場比賽就像一條謎題，一開始像柯南，限時解開謎題，還要分配體能完成賽事。

拚盡一切，為乜？這句我問過自己無數次。當你每日訓練到凌晨、獨自安排參賽、冇團隊、冇資助、冇人知道你做緊咩，你會懷疑：「值唔值得？」甚至會問：「就算攞到世界冠軍又如何？我不過係做緊一樣自己鍾意做的事。」所以我常跟別人，也跟自己講：「冇錯，香港冇雪，但我都可以攀冰。如果你有嘢想做，點解唔行出第一步？至少你為自己爭取過。」這條路冇捷徑，冇觀眾。好似只有我一個人，喺健身室、攀石場、機場、異國山林之間穿梭，用一種近乎固執的方式，走出屬於自己嘅軌跡。

但我慶幸，雖然睇落好似孤軍作戰，實際上唔少人喺我背後支持。有人聽過我嘅故事之後，主動幫手，例如物理治療師、運動品牌、前輩們。所以我好感恩：「看似一個人行哩一條路，但幫我嘅人就好似螢火蟲一樣，就算前面一丈冇人，但有你哋嘅照耀，令我可以向前行，因為條路係光明的。」我並不孤單。