運動，誠信？｜源來如此

By DanielChan, 01 August, 2025

運動，誠信？｜源來如此

筆者從2020年起，便擔任世界羽毛球聯會的誠信大使（BWF Integrity Program“I am Badminton”Ambassador）。好多人會問：作為誠信大使，職責到底是什麼？作為運動員，我哋首要任務當然係要保持我哋喜愛嘅運動有一個公平嘅競技平台，讓大家能有一個公平嘅環境，去發揮水平、發展你喜愛嘅運動。咁到底運動員要負責嘅誠信部份是什麼？我大致可以分為以下四點：

第一，必定要盡全力去發揮，盡全力去完成比賽。在不同的比賽中，有好多唔同嘅原因，會令球員有機會唔盡全力去完成比賽。特別係非淘汰形式嘅比賽，例如小組賽或計分聯賽，當參賽運動員喺未完成晒所有賽事已經知道一定會出線，或者一定會出局，運動員好容易喺餘下嘅賽事加入好多計算，而冇盡全力去完成賽事。雖然咁樣未必會影響到自己嘅比賽成績，但係咁樣嘅操作會影響未完成賽事嘅其他運動員，仍然會對其他運動員唔公平。所以所有運動員都必須盡全力去完成自己每一場賽事，不管在什麼環境以及情況。

第二，不可以對任何自己比賽，或者有關連嘅比賽進行賭博。不管有心定係無意，只要對自己有份比賽，或有關連比賽嘅賽事進行賭博，難免令人認為你有操控賽果嘅嫌疑。

第三，不可服用禁藥。相信各位讀者都好清楚，服用禁藥可以令運動員提升比賽表現，或者有助佢哋復原以達到更大嘅訓練效果。為咗保持所有嘅運動項目可信、可靠以及誠實，各個體育總會以及運動組織都大力打擊服用禁藥。而運動員以及教練亦有必要知道以及履行不服用禁藥這個規則。其實所有體育總會以及國際體育聯會都大力推行禁藥嘅教育，所以運動員及教練都冇藉口話俾人哋聽自己因為唔清楚藥物或食品嘅成份，而誤服禁藥。而所有服用禁藥嘅後果，都會以懲罰運動員禁賽作結尾，一般以兩年到四年為限期，一個咁長嘅停賽期絕對對運動員嘅黃金時期有好大嘅破壞性。

第四，哩個基本只係適用於殘疾人士運動員。每個殘疾人士運動員都會經過級別鑒定(classification)，運動員有責任誠實地將醫學報告，以及身體嘅能力喺級別鑒定中公平咁顯露出來，從而令等級鑒別師可以成功而公平地將運動員準確地分入特定嘅級別，令同一個殘疾情況嘅運動員可以在一個公平嘅組別下一同競技。大部份殘疾人士喺平常人生中已經面對緊好多嘅唔公平，佢哋都希望可以喺運動場上面搵到一個公平嘅平台，而令自己可以發揮所長。所以一個公平而透明嘅等級鑒定程序，以及每位運動員嘅誠實操作，可以令到殘疾人士運動更加完好以及成熟咁樣發展，吸引更加多殘疾人士進入殘疾人士運動。

作為運動員，甚至作為喜愛運動嘅每一位讀者，都希望所喜歡嘅運動可以長久，穩定，以及公平咁樣發展。所以有一套公平而誠實嘅機制以及系統，配以一班堅決落實這些可靠以及可信規則嘅運動員以及參與者，哩一啲運動項目先可以堅實咁樣發展。所以不論你係參與者、運動員，抑或是建立規則嘅持份者，希望大家都可以抱住公平競技、人人平等嘅原則去守護你哋熱愛嘅運動項目。只有公平與誠實，大家先會喜愛運動。就好似世界羽毛球聯會誠信大使計劃中的口號一樣：
I am clean;
I am Honest;
I am badminton !