練習日記—K形劍 (14/7/2025)｜Road to MARS

By 蔡俊彥, 01 August, 2025

練習日記—K形劍 (14/7/2025)｜Road to MARS

今日為世錦賽出發前最後一次對打訓練。特此撰文紀錄。今年世錦賽將會喺Georgia舉行——唔係美國城市，係歐洲國家格魯格亞。第一次去，有少少期待。

今日下午訓練內容為自由實戰，可以自行決定打幾多場、打幾多分、打邊個。因為攞咗啲劍出去畀人整，所以我得返一把劍喺訓練場地。拎起支劍試試，嘩，支劍呈蛇形狀，此乃「K形」劍。劍身一般前半端微微向下垂為最佳型態。再攞起支劍，配合步法移動，試吓想像對手喺前方，做一啲基礎攻擊動作嚟熱身⋯⋯唔掂！支劍好唔掂，好唔順手⋯⋯好吧，劍唔順手，又就嚟比賽，都係打兩場十五分算。

如是者，第一場練習對手為Michael，一位青年隊好手，比分一直咬得好緊。8-7我領先。感覺自己前半段猶疑太多，不夠進取，決定後半段更加aggressive。我隨即猛烈搶攻，成功！9-7，10-7，11-7。再次發動猛烈進攻，壓住對手支劍，再搵落點，搵到了！腰係空嘅，我拮⋯⋯頂！拮歪咗⋯⋯對手得分。好嬲，如果唔係哩支K形劍，哩分一定拮到。唔可以嬲落去，劍唔好，但戰術方向正確，繼續耐心執行。最終15-11戰勝。下次對哩個對手我要早啲壓逼，再加埋一把好啲嘅劍應該可以贏多啲。

第二場，對手為千雨，香港排名第三。我記得上次練習雖然贏佢，但後半段打得有啲急，今次要再有耐性少少。3-1落後。唔緊要，沉住氣，唔好急住搶攻，繼續穩守突擊，成功追至3-3。雙方你來我往，我暫時領先8-7。劍唔順手嘅問題一直存在，但而家埋怨都冇用，專心諗戰術吧！前半段向上打佢支劍唔太攻到佢，後半段試吓向下打。9-7，10-7⋯⋯11-8，哎，又係支劍，又拮歪咗。喂，唔好又畀哩樣嘢影響情緒！冷靜！下一分再向下壓劍進攻。得咗，12-9。最終勝15-9。

既然是世錦賽出發前最後一課，就打多兩場！感覺我已經適應咗把K形劍。接下來兩場都比較得心應手，以15-9及15-6獲勝！好吧！今日訓練結束。

自亞錦賽後，感覺自己防守比以前穩固好多。以前我淨係進攻勁，防守廢，過份依賴進攻去攞分，反而令自己變得焦急，因為怕一攻唔到，防守時就會失分。而家攻守兼備，感覺進攻能力都會加強，唔怕攻唔到，因為就算攻唔入，我防守一樣攞到分。至於支「K形」劍，我就帶埋一齊去Georgia啦⋯⋯希望好狀態能夠延續，喺世錦賽有好嘅表現！

順祝各位香港劍手世錦賽獲得佳績！完。