【第十五屆全國運動會】全運會保齡球港隊惜敗
港將享受每一球的歡呼

第十五屆全國運動會香港區賽事正式開鑼，打響頭炮的是群眾賽事活動的保齡球項目，於8月22、23及24日在啟德體育園「Top Bowl」保齡球中心舉行。香港派出勝出6月選拔賽的港隊退役男子及女子隊出賽，雖然並未獲得獎項，但在全場熾熱的氣氛下，大家不約而同地說到相當享受球迷歡呼聲下打波的過程。

全運會保齡球項目設有多個賽事及賽制，分途出擊的男子及女子隊均需以球隊名義參加雙打及五人隊際賽，雙打以12局的貝克賽制舉行，球員需要輪流投球；煞科的五人隊際賽則需分上下晝各打9局、總共18局的貝克賽制進行；隊員亦可以個人名義出戰單打賽，根據6局比賽中的總分數來分高下。至於除個別賽事成績外，亦會以綜合分數為是次保齡球項目分出排名。

經過合共24隊三天的激戰，最終團體成績上香港男子隊以11888的總分飲恨僅獲第5，男子冠軍則由廣西壯族自治區代表隊以12035高分掄元。至於香港女子隊則以10978分取得第9位，女子江蘇省代表隊則以11728的絕對領先地位封后。

歡呼聲與支持帶來信心

負責打男子隊首球的謝仲賢在賽後表示滿意自己表現：「因為我打第一個，其實都係主要試條Lane（球道），講多啲資訊畀隊友聽，等佢哋有唔同嘅變化。」他覺得球隊表現在吸收前兩天的經驗後有所進步，可惜未能踏上頒獎台。黃子維則提到隊內的溝通良好：「我哋大家每打一球都會有反饋，同大家講條球道變化係點，咁就盡量做好啲。」他亦特別提到在熟悉語言的打氣聲下打波「有少少感動」，每打一球都是在享受比賽過程。謝仲賢亦補充觀眾為他們帶來信心：「我打每一球都聽到佢哋support我哋，其實都係震懾到我哋自己，可能有啲波打得唔好，但係聽到佢哋歡呼聲同支持，令我哋有信心打下一球。」

女子隊方面，梁芝榕就說到球隊在最後一日急起直追，發揮有進步：「咁我哋一開頭訂立嘅目標一定係想攞到頭三名，咁始終我哋都未算係做得好好，我哋靠開波頭兩日嘅經驗慢慢調整返節奏同打法，咁去到第三日就希望有改善，都有打得好過頭兩日。」譚舜而就說到很高興能夠在香港主場出戰，特別是見到許多朋友、家人到場支持。她亦提到球隊已盡力打，惟球道上的變化及對手打法上難以適應，但依然享受比賽過程。對於在主場出戰的壓力，二人不約而同地說到主場熾熱的歡呼聲是推動自己前行的原動力。

現場氣氛更勝世界賽

中國香港保齡球總會主席劉掌珠女士表示對賽事能夠順利圓滿舉行感到滿意，更直言是次全運會保齡球賽現場氣氛之熾熱更勝世界賽。「我諗我做咗賽事咁耐，今次係做得最好嘅現場氣氛。」對於在香港舉辦首次登上全運會的舞台的保齡球項目，見慣大場面的劉掌珠除感到光榮外亦直呼緊張：「我其實好緊張，係比我做自己嘅賽事更緊張，因為今次唔係只係關乎保齡球總會，係關乎整個特區、全運會嘅一部份。」

繼年初在本港舉行兩個世界級賽事，6月舉行全運會選拔賽，再到現在舉行全運會群眾活動，劉掌珠認為這一系列活動均有助令保齡球運動普及化：「其實群眾活動已經推動緊，唔係淨係精英有得打，唔係我個會嘅會員先有得打。因為我哋open selection（公開選拔），所以你都見我哋有95隊、77隊男子、18隊女子參賽。呢個result我好滿意，我都估唔到有咁多人有興趣參加。」

Text：Alex Wai
Photo：Alex Wai，Stephen Yau