練習日記—重新出發(10/8/2025)｜Road to MARS

By 蔡俊彥, 29 August, 2025

練習日記—重新出發(10/8/2025)｜Road to MARS

世錦賽結束，一直以為假期來了，可以好好休息。估唔到一波完了一波又起。我到訪台灣，參與好朋友舉行嘅劍擊訓練營……

訓練營嘅參加者都是青少年或者小朋友，我主要幫忙指導小朋友，並同佢哋進行對打實戰、單對單個人訓練。

本以為輕輕鬆鬆每日工作四小時，進入半放假狀態。沒料到，最後工作量大增，喺朋友悉心安排下，每日工作朝9晚6，午休只有30分鐘…..為期七日。能夠同咁多小朋友互動係非常開心嘅，但亦都非常非常疲累。

老實講，工作咗三日，我已經覺得唔會頂得住。不過有志者事竟成，好不容易，撐到最後一日了！終於結束！！真正嘅假期來了！

訓練營結束，朋友安排全部教練員一同晚飯聚餐。教練團包括幾名來自英國、美國、日本嘅現役劍手，仲有來自韓國、美國同意大利嘅現役教練。全部選手都戰績彪炳，在國際賽事都攞過獎牌。其中一位不得不提，就係來自韓國嘅Kim Jung Hwan佩劍選手。世錦賽金牌、奧運會金牌，仲有各大型國際賽事獎牌，乜都攞過，佢絕對係一個傳奇人物。

晚餐期間，我坐喺Kim隔離，佢一直用翻譯app同我溝通，分享咗好多佢自己嘅比賽經驗同人生經歷。原來我哋嘅經歷都幾相似，所以幾有共鳴。最後佢亦好好人，講咗好多鼓勵我嘅說話，我真係好感恩認識到佢。最後佢講咗一句說話：「我相信你有一日會攞到奧運金牌。」我：「嗯，隨緣吧！多謝你！！」

飯局結束後，我返到酒店房，思考咗佢嗰句說話好耐。仲記得八年前，如果人哋咁同我講，我會答我一定得，又或者唔使人哋同我講，我都會同人講我想攞奧運金牌。我而家當然仲想，但感覺比較佛系：有咪有，冇咪冇囉，不能強求。

但係點解我要變得佛系？想要咪想要囉，做乜要隨緣？怕咩同人講，最後唔得，都唔係問題，起碼我勇敢相信過！唔好因為東京同埋巴黎失利，而變得畏懼吧！

第二朝，我喺酒店大堂見到Kim，就上前同佢講：「我一定得，多謝你！」我們兩人相擁，並告別。希望再會時我都有故事分享畀佢吧！完。