黃澤林美網32強創歷史
獲UTS破格發外卡參賽

黃澤林在本年度美國網球公開賽上技驚四座，取得超卓成績並成為首位晉身大滿貫男單賽事三十二強的香港球員，創香港網壇新歷史！

黃澤林先在外圍賽連勝三場，首仗以直落兩盤淘汰世界排名第159位的盧森堡籍球手洛迪殊後，第二場以盤數2：1反勝世界排名第131位的意籍球手積簡迪，最後再以直落兩盤擊敗世界排名第151位的英籍球手比利夏里斯，闖入美國網球賽正賽圈，成為首位在公開賽年代打入大滿貫單打正賽的港將。他在正賽圈繼續過關斬將，以直落三盤先後戰勝世界排名第71位的美國球手高華斯域Aleksander Kovacevic，以及澳洲球手Adam Walton，殺入三十二強。他面對世界排名前15的俄籍球手盧比利夫Andrey Rublev，仍與對手打得你來我往，發球更比對方強勢，最後在生涯首次戰至五盤下，僅負對手2：3，以首次打入大滿貫正賽的選手而言，黃澤林完全交出超班表現，令人眼前一亮。

黃澤林昨日(1日)凌晨載譽歸來，抵港後先感謝在現場及香港觀看球賽直播的支持者，「好多謝大家，希望大家繼續支持我，因為你哋每一句加油，每一句支持都會喺下一場困難嘅時候或者關頭幫到我，多謝你哋！」回顧最後於三十二強對陣盧比利夫的精采一戰，他認為這場戰役對他的職業生涯有莫大幫助：「到第四盤已經好鬼攰，因為我之前已經打咗好多場，我一路同我團隊講我好攰，但我都一路堅持住，所以去到第五盤我都無諗咁多。喺戰術上有少少改動，第一盤我破佢發球局，到佢開波就放一放，以守住自己發球局為主，點知俾我逼到去第五盤，但始終我經驗未夠多。今次係好好嘅一課同好特別嘅經驗，我學到體力同戰術上應該點去應付五盤賽事，Rublev打五盤嗰陣好似無乜嘢咁，但我就好似好攰。我會繼續努力，希望下一次做得更好。」

黃澤林受訪時表現非常輕鬆愉悅，除了因為滿意自己的表現，更因為能好好享受一場熱血沸騰的賽事，「我對自己嘅表現喜出望外，由外圍賽開始贏咗6場比賽，但其實每一場都有機會輸，如第二場外圍賽對意大利球手，由4-1被追至局數5-4，爭啲輸第3盤，我每一場都好緊張。」但只要踏上賽場，他便不忘初衷，「對盧比利夫嘅時候最尾球場係坐滿哂，一開始打波就係為咗喺咁大嘅舞台上享受比賽。」他很高興可以走到三十二強，亦能與專程到當地支持自己的家人分享第一次打入三十二強的喜悅，一同見證他職業生涯的里程碑。

第一次打進大滿貫正賽，黃澤林感新奇：「包括要打五盤賽事，第一次打大滿貫仲要打六場咁多，氣氛又唔同，每一日要做嘅嘢都唔同。我喺更衣室嘅時候隔離就係祖高域、艾卡拿斯，我以為會同電視上見到嘅球手距離好遠，但原來唔打落去唔知同佢哋差幾遠。」黃澤林分享做賽後恢復時遇上Taylor Fritz，便請教他第一次打五盤的經驗，各球手亦會樂意與他互相分享，不會有球星架子，大家都很純粹地享受網球。

黃澤林休息過後，九月中將會披起港隊球衣，出戰台維斯盃世界組二對烏茲別克。此外，首度進軍亞洲並以香港作為首站的全球矚目創新網球賽事 Ultimate Tennis Showdown，於今日（2日）更破格發出外卡予黃澤林參賽，於啟德主場迎戰一眾世界級球手，包括捷克球手馬查克Tomas Machac 在內的八位網壇巨星，更有望再戰盧比利夫！黃澤林分享感想：「能夠喺主場參加 UTS 賽事係我職業生涯嘅重要里程碑。我從小喺香港訓練，每一步都離唔開香港球迷支持。我急不及待喺球迷打氣下出戰，你哋嘅支持將會係我嘅最大動力，今次可以同一眾世界頂級選手交鋒，我會全力以赴，畀世界睇到香港網球嘅潛力！」

Text：Keission
Photo：ArcK Photography，中國香港網球總會