練習日記11/11/2025–全運會備戰｜Road to MARS

現代人云：「努力練習先至有好成績。」本人十分認同。而最好嘅練習莫過於比賽！

啱啱就打完西班牙世界盃，自己好叻仔，開局贏緊7-0然後輸返15-13，64強出局！真係好替自己感到驕傲！不過，我唔會咁容易自滿，所以返香港呢程機，不停諗，不斷諗，自己究竟有乜可以做好啲。

我哋一共要搭兩程機，先由西班牙去瑞士，再轉機飛返香港。第一程機我就開始諗、諗、諗⋯⋯
諗到瞓着咗。

「咳，咳，咳。」隔離位咳。我醒咗。咦！到啦喎。「嗦、嗦、嗦」隔離位嗦鼻涕。嘩，佢病喎。好彩我帶咗口罩。摸下自己塊臉⋯⋯大鑊，唔記得戴口罩！真係做乜諗嘢，諗到唔記得戴罩⋯⋯

第二程機即刻帶返口罩！但皇天不負走心人，第二程機中段，即刻喉嚨痛。我抱住人定勝天嘅心態，衝去洗手間，用鹽水洗鼻，沖康鈣C，食橙，食傷風素，拉筋，做盡一切人體急救。

可惜無補於事⋯⋯

唉，結果又病，又比賽之前病。好吧！返到香港即刻睇醫生。今次唔理啦，最緊要好得快，食抗生素吧！

距離比賽仲有大約一星期，希望好得返啦！難得全運會喺香港搞，希望可以係屋企人，朋友及一眾支持者面前打到一場精彩嘅比賽！

順祝
所有香港劍手喺全運會有好嘅成績！

Text：蔡俊彥
Photo：Lucien Chan
原文刊於《運動版圖》2025年12月號
更豐富內容請支持印刷版或電子版！