醫者父母心｜源來如此

近年運動醫學被提起嘅次數愈來愈多，對運動員嚟講亦變得愈來愈重要。無論係運動成績定係運動員嘅成長，保養都同運動醫學息息相關。運動醫學團隊對運動員嚟講，不單止係治療人員同運動嘅關係，喺整個運動生涯之中，運動員往往會同醫療人員建立起一種比家人更親密、更重要嘅關係。

每當球員受傷，情緒一定係最低落，意志力亦最薄弱，負面嘅想法會一湧而上。哩個時候，醫療團隊要醫治嘅唔止係身體，仲要照顧運動員嘅心靈。

以筆者為例，喺衝擊2024年巴黎殘奧會嘅三年間，由於訓練量高，加上年紀唔細，好多以前未經歷過嘅傷患都接踵而來。其中最嚴重嘅，就係腰部傷患。最嚴重嗰陣，連落床行一步都做唔到。

當時我好徬徨，睇報告時第一句就問醫生：「我仲可唔可以打返高水平？」醫生只係簡單答咗一句：「可以。」哩句「可以」睇落簡單，但其實蘊含住好多深意。

第一，哩句說話畀咗我好大信心，令我有能量、有目標去面對復康嘅日子。

第二，講出呢句說話需要好大勇氣，因為要擔保運動員可以回到高水平並唔容易。如果運動員咩都做齊，最後都好唔返，佢可能會埋怨：「又話好得返？」所以講哩句說話，一定要有經驗、有膽識。

面對復康，我每日都誠惶誠恐，驚復原唔夠快，驚練得太猛會令舊患復發，又驚練得唔夠而追唔上對手進度。哩啲恐懼會令人變得好脆弱。有一次治療，我驚到直情問治療師：「如果冇咗你哋，我會點算？我仲打唔打到落去？」

佢哋答：「咁我哋陪你陪到你退役，咪得囉！」

簡單、有力量、令人感動！

結果，整個衝擊巴黎殘奧嘅過程都係喺傷患之下完成。醫療團隊百份百照顧住我，直到巴黎殘奧決賽前嘅一分鐘。

喺決賽前夕，仲有兩個鐘就開賽，我腰部舊患突然復發，可能係因為緊張，可能係決戰前嘅壓力，痛到郁都郁唔到。嗰陣我真係以為自己唔可以出場比賽，唔能夠喺所有人面前完成哩場奧運決賽而令我懊惱。

我哋兩位治療師用佢哋最專業嘅方法令我可以郁得返，雖然唔能夠回復到100%狀態，但最少令我可以完成賽事，唔會喺國際生涯最後一場比賽留下遺憾。

有啲人以為運動醫學只係輔助運動員嘅一部份，但今日，運動醫學已是成就運動員其中一個重要關鍵。

Text、Photo：陳浩源
原文刊於《運動版圖》2025年11月號
更豐富內容請支持印刷版或電子版！