給自己完成全運的一封信｜輝之筆去

By 謝永輝, 02 January, 2026

給自己完成全運的一封信｜輝之筆去

謝永輝，恭喜哂你呀，終於完成咗全運會。無論個結果如何，你都要為自己而感到驕傲。而家就好好享受生活，搵多啲朋友食飯，陪多啲屋企人，玩下其他運動，做自己鐘意做嘅嘢。辛苦咗咁耐，絕對可以先休息一下，辛苦晒。

寫緊哩封信嘅哩一刻，距離全運會仲有25日，眨吓眼就得番25日。當初聽聞全運會喺啟德搞，到確實消息，開始準備，然後一直為全運會練習，當中去咗唔同地方集訓，經歷咗好多好多嘢，終於到咗最後階段。

老實講，我好期待今次全運會有好成績，希望到時你睇返嘅時間係拎住歷史上第一塊獎牌。但同時，喺未打嘅哩一刻，我都知道絕對係唔簡單，所有對手比我哋更重視全運會。有時覺得，拎全國第三哩句說話好似係我地嘅口號多過我地能夠做到嘅嘢。唔係悲觀，而係事實，人哋係搵飯食，對手比我哋想像中水平更高，更加努力，更加得閒，我哋只有熱心同熱誠係一定唔夠人哋打。我哋要有打仗嘅感覺先可以打贏。唔可以仲有藉口話因為我哋係業餘隊所以唔夠人打，哩啲係輸家嘅藉口。如果有咁嘅諗法，我地哩一世都唔會贏到。可能到時成績好唔理想，令到香港嘅各位覺得男子手球吹咁大，又話全國第三嘅，打到咁差。落到球場就係人人平等，勝者為王，敗者為寇。無人諗到我哋成隊為咗全運會練咗幾多次波，跑咗幾多次，放棄咗幾多嘢，大家都只會睇成績，贏唔到就什麼都不是。好希望最後我哋可以爭氣贏返次！

撇除全運會成績，我對於今次嘅全運之旅好滿意。原來可以為全運會做咁多嘢，唔夠重就食多啲，唔夠力就舉鐵，遇到問題就一直諗方法解決，好似一路過關咁樣，令到成個人成長都好多，見識咗好多嘢，亦都更加了解自己。起碼到時入棺材嗰陣，一定諗起哩一刻，多謝自己咁堅持。

希望到時你可以好好咁享受哩個舞台，預祝你全運會目標達成，可以拎到全國第三。