最終章（暫時）｜Road to MARS

對唔住！哩篇會係（暫時）最後一篇喺Sportsoho寫嘅文啦！告別得有啲唐突，但其實已經考慮咗好幾個月。

首先非常感謝Sportsoho，尤其係Nicole，畀咗哩個平台我去用文字發表及抒發一啲感受，紀錄一啲心路歷程。對唔住我真係一個不折不扣嘅deadline fighter，辛苦Nicole每個月追我稿。

回顧過去哩兩年，其實都估唔到自己幾鍾意寫嘢。睇返有幾篇文都不禁沾沾自喜，覺得自己寫得唔錯，on9得嚟帶點深度，不愧為DSE 作文5！LOLLLLLLL

頭十篇我都真係寫得好有熱誠，包括撲克小說都係，感覺有好多嘢想同大家分享。

但我諗大概半年前啦，自己開始冇乜嘢想寫，感覺自己嘅創作到達極限，有啲「滑牙」。每次交文都好似為寫而寫嘅狀況⋯⋯我都唔知點解會咁⋯⋯

點都好啦，唔排除，如果Sportsoho畀，可能有一日我會寫返，但哩一刻我真係希望暫時休息一下。

過去我諗都寫咗二十篇以上，好多篇都別具意義，因為都紀錄咗好多我成為世界第一之前嘅心路歷程。

人真係犯賤，寫到哩度又有啲唔捨得。但決定咗就唔好三心兩意啦。再次感謝Sportsoho！有緣再會！

暫別。
蔡俊彥上

Text：蔡俊彥
Photo：作者提供
原文刊於《運動版圖》2026年2月號
更豐富內容請支持印刷版或電子版！