休息是運動員工作一部份｜鈞動敢言
認識我嘅人可能會覺得，我球場外嘅生活喜好，唔似一個傳統運動員。我想講係真嘅，我有時會刻意發掘新嘅興趣，咁樣先可以避免腦海淨係得足球哩兩個字。點解要咁做？因為我都係人，當練完波比完賽絕對唔可以不停諗今日練得好唔好、滿唔滿意自己比賽表現，我相信咁樣好容易壞腦。人有情緒，心情有高低，自己要搵方法平衡，好多圈外朋友都興講一句：「今日唔想講公事。」人大咗開始明白背後嘅原因，所以我將目光擴展到其他興趣，為嚟緊嘅比賽保留住最新鮮嘅作戰狀態。場外嘅生活亦好重要，對於運動員嚟講休息都係工作嘅一部份，而科學從來解釋唔到，休息係調整心態最好嘅治療。
我喺球場外會做嘅事，可以話非常悶唔似一個所謂「少爺仔」會做嘅嘢，不過唔一定要多姿多彩先有意思，一切都係睇心態。
Off season我會勸相熟嘅隊友，有幾多去到嘅旅行都要去盡佢，無論同屋企人、朋友甚至自己一個，都要去。世界好大，但去旅行認識嘅唔只係當地文化，而係你自己，有好多關於自己嘅答案，都唔會喺熟悉及舒適嘅屋企搵得到。
蒲Coffee Shop好適合忙碌嘅我停一停諗一諗，安排好自己身心嘅節奏。有時亦會打電話畀關心嘅人，攞少少靈感繼續上路。我都鍾意約朋友出嚟歎杯咖啡，唔太鍾意用文字維繫友誼，鍾意面對面傾計多啲。日後有機會都會考個咖啡課程，不過真係有機會先。
我鍾意釣魚，呢個唔係秘密，不過香港魚愈嚟愈唔好釣，又細條又難釣，但純粹想過吓癮嘅朋友當然歡迎。釣魚係好講科學嘅遊戲，最緊要係你釣到咩，都可以夜晚拎返去煮嚟食。
我好鍾意研究唔同嘅食物，但我係個超級低level嘅foodie。除咗鍾意煮飯，我會慢慢research有啲咩正嘅餐廳啱我，食物文化會係我priority list排最頂。
音樂對我嚟講好重要，當中廣東歌文化對我嚟講係最型最有深度嘅。當有喜愛嘅歌手舉行演唱會，我一定會把握難得機會，現場好好欣賞表演。
Text、Photo︰陳肇鈞
原文刊於《運動版圖》2024年10月號
