傷患︱鈞動敢言

By 陳肇鈞, 27 五月, 2025

傷患︱鈞動敢言

傷患係最困擾運動員嘅問題，亦都係必須面對嘅問題。

我一個月前受到一個我從未遇過嘅膝頭內側韌帶受傷，可以話不幸中嘅大幸，就係冇完全斷晒，而且呢一條韌帶其實會自己隨時間慢慢好返，唔需要做手術。受傷過程唔多講，反而係想講吓當中上到嘅一課。

受傷一開始，行動不便就一定會感受到，跟住慢慢發現原來真係隨年紀越大，康復冇預期咁快，到呢一期專欄我先至重新練返波，不過已經去到球季最後嘅階段。呢三四個星期我都係重複再重複咁喺物理治療同埋中醫來回折返，用盡方法醫好自己。喺場邊睇住球隊比賽，自己感覺到好無助，不過喺悲哀嘅同時，亦感受到一份溫暖—就係好多人關心我，無論係朋友家庭都好支持我，亦都想喺度多謝一班醫療團隊，同埋用盡一切方法幫我恢復嘅醫生。

短短嘅運動員生涯入面，一定要用盡所有方法去防備傷患，不過尤其係踢波同其他有身體對抗性嘅運動，點樣避免都好，都一定會有受傷嘅可能性。我覺得個重點唔係喺個痛楚或者治療呢一個話題入面，而係你點樣去平衡自己嘅心理。呢個傷患對我打擊好大，我一開始無法接受，不過慢慢發現其實個上天都已經對我好好，咁多年嚟都冇咩大病痛，而呢一個膝頭問題亦都算係好細，只不過係喺一個好差嘅時間點整親。

我希望其他運動員、足球員喺受傷同治療嘅過程入面，搵到安慰，揾到釋懷。有時可以當唞一唞，用第二個角度睇吓自己個定位喺邊，借住呢一個場邊休息嘅時間，睇清楚自己嘅方向。

我再次多謝大家嘅關心，多謝所有醫療嘅朋友比我嘅意見同埋關懷。