唔用粗口寫作系列──《序幕》｜劍擊

大家好！我係劍擊運動員蔡俊彥，大家可以叫我Ryan，有啲人鍾意叫我菜仔、菜頭……我而家正積極備戰國際賽事，爭取出線巴黎奧運，暫時世界排名第十六，香港排名第一（因為張家朗甚少參加本地比賽）。非常感謝Sportsoho畀呢個機會我寫專欄，曾經我都有見到其他運動員喺其他平台有寫作，自己能夠得到一個咁寶貴嘅機會一定會好好珍惜！

對上一次寫一篇八百字嘅中文文章，應該真係DSE（2015）嘅時候。當時我以為自己寫作應該有七、八成會炒，因為我係寫議論文嘅時候，情急之下攞咗自己做例子，當時中文老師上堂時話我應該可以試吓用運動員身份做題材，我抱住搏一鋪嘅心態，題目我已經唔記得，反正我就係攞咗自己可能係林丹、愛迪生做論據嚟論證，一副充滿自信嘅樣子行出考試場，結果一同同學分享，畀人笑到趴喺到。當時我心諗凶多吉少……沒想到最後我中文寫作竟然得到5！我好想好想衷心地多謝當年嘅改卷員！因為中文寫作卷嘅分數，我中文總成績先冇炒到，先至入到大學！（雖然我到而家都仲未畢業……）

分享頭先嘅故事其實係想帶一個大大嘅頭盔：本人文筆上真係冇乜天賦，再加上多年冇寫作，請各位多多包函！

自己至今差不多六年嘅運動員生涯入面，都會偶爾喺比賽前後接受訪問。不實無理嘅指控內容幸好真係從未遇過，亦遇過好多好好嘅記者，做過好嘅訪問，亦有讀過關於自己好嘅報道。至於點樣為之一個好嘅報道，本人認為應該要夠真實，貼近受訪者當時文字上面想表達嘅意思。唔同嘅前文後理，或者受訪者唔同嘅語氣，可以令同一句句子、同一個詞語有唔同嘅意思。我曾經試過訪問中想表達嘅重點明明唔係講緊某一個主題，卻被記者誤解成為整個訪問嘅中心思想，並將該主題變成報道嘅標題同主題而感到困擾。我亦有因此反省過可能係自己嘅表達能力都有少少問題，唔夠清晰？（所以我而家成日玩狼人殺，呢個遊戲可以幫助我加強表達能力！）

今次可以用自己嘅文字、自己嘅文章，完全冇filter去畀大家更加了解同認識我。再被人誤解，都唔關其他人事，除非Sportsoho改我啲文……

我會撰寫嘅內容主要圍繞住我爭取出線東京奧運、巴黎奧運嘅一點一滴，希望可以為大家百忙之中帶到一點娛樂！下回繼續分解！

香港劍擊運動員，首位於青年奧運會獲得金牌的香港花劍手，近個人最佳成績為2022年花劍格蘭披治大獎賽韓國仁川站取得個人銀牌。

原文刊於《運動版圖》2024年3月號