致香港的足球員：勿忘初衷｜鈞動敢言

By 陳肇鈞, 03 三月, 2025

致香港的足球員：勿忘初衷｜鈞動敢言

上一期專欄提及到香港隊嘅球迷。小弟今次想留返一期俾咁耐以嚟，喺香港奮鬥嘅足球運動員。

好多認識我嘅足球員(大部份都係同我並肩作戰過嘅)一熟落都會好自然地，比較多見到我開心同好勝嘅一面。如果咁啱你哋睇到呢一期專欄，咁就容許我同大家講少少認真嘅說話。

喺香港做足球員從來都唔容易，艱苦嘅位、面對嘅困難，相信大家都深深感受到，唔需要喺度再重複。比起其他運動，我哋永遠都有少少吃力不討好嘅感覺；比起其他行業，我哋永遠都有一種暗藏嘅卑微。付出永遠好大，但回報從來唔足夠，永遠去到一個位就成日都會諗，幾時先至係夠皮。成日都要睇賽果做人，情緒嘅高低起伏反覆又反覆咁輪迴，但係又會因為某程度嘅情意結而搵到原因，叫自己堅持落去。

無可避免嘅事實係，我哋足球員好似獨自一角咁，同其他運動員嘅社交唔係特別多，曝光率亦都唔係特別高，保障亦都係特別少，生態亦特別唔長遠。所以每一個禮拜備戰下一場比賽嘅循環之中，明白到大家都有時會感受到氣餒，甚至乎有少少坎坷，睇唔到出口喺邊度，睇唔到日拼夜拼傷痕纍纍係為咩。

見到好多提早離場嘅朋友有更好嘅發展，不能避免就係自己點都會有少少羨慕，但係佢哋嘅生活又一定比我哋好得多？

我絕對無資格比任何實質嘅意見大家點樣做，不過希望可以喺今期嘅專欄提醒大家：勿忘初衷！要記住選擇呢一個運動嘅第一日，係啲乜嘢原因令大家咁鍾意呢個運動。成功感，好多地方都可以搵到，不過球場裡面嘅成功感好難可以取替到。絕殺贏波、血肉牆城守住每一球、捧杯，哩啲感覺其他工作未必俾到我哋。犧牲咗咁多時間，跑咗相信都有半個地球，如果真係要離開嘅，都要俾一個好好嘅原因自己。

對我黎講足球真係好似藥癮咁，你叫我有一日起身發現原來唔需要再出球場練波，相信每一位包括我自己都會好唔捨得。今日嘅我，都係因為喺球圈長大、球圈湊大我，我哋有我哋嘅小聰明，我哋有我哋跟一世嘅獨特文化。要記住我哋係一班另類嘅人，我哋係一班特別捱得苦，意志力同態度絕對唔會輸蝕嘅一班人。千祈唔好睇小自己，足球仔比你哋想像中叻好多。要帶住一份驕傲出去見其他人，踢得職業嘅，冇人係nobody。

呢一刻無能力，但係假設將來有嘅話，我一定會貢獻返落球圈，支援有需要嘅本地球員。

多謝球圈，多謝各位前輩嘅教導，多謝咁多位同我一齊踢波嘅朋友，無你哋絕對無我。大家繼續努力，無論係對手定係隊友，我都非常尊重大家。