過去幾個專欄都係講關於我嘅生活或者足球上遇到嘅問題。留返一篇同你哋講嘅說話，除咗感激你哋多次球場內外獻上嘅無條件支持之外，亦都想講吓你哋有幾重要。
亞洲盃旅程見證到你哋嘅威力，無論對足球嘅熱情同對每位球員嘅擁護都深深感染我。近十個鐘頭、六千幾公里嘅路程都冇阻你哋去支持我哋，喺地鐵、球場內、比賽入面嘅激情片段，依家都仲會喺我腦海漂浮出嚟，好似尋日發生咁，非常刻骨銘心。香港隊通常對住排名更高嘅亞洲球隊都係輸多贏少，不過你哋無論高山低谷，都會全場90分鐘不停唱歌打氣，將我哋原本冇哂嘅氣力都推返出嚟。甚至乎今日香港隊主場變成一個好大嘅party，扯入埋原本唔睇足球比賽嘅朋友。
球市有球市嘅低迷，作為球員嘅我哋好多嘢都好迷惘好無助，或者可以形容球圈前景為坎坷。所以有時諗諗吓，一個好值得堅持落去嘅燃料就係你哋嘅入座率，同埋你哋嘅獨立球迷打氣團體。我去過其他運動比賽，見到觀眾入座率相對同足球仲有一段距離。我仲記得幾年前都唔係好似今日咁瘋狂，你哋由當日嘅幾百人建立，去到今日接近一萬人！完完全全係球迷你哋嘅功勞！
或者可以話，如果唔係你哋嘅話，我自己一早已經離開咗呢個球圈，所以希望你哋明白呢啲嘢嘅重要性。
多謝你哋，風雨不改咁去做我哋嘅第12 人。
多謝你哋，令我哋知道我哋仲有價值。
多謝你哋，為下一代建設一個值得延續嘅生態。
我應承唔到點樣可以好好咁報答你哋，唯有做好自己交出100%嘅表現，亦都想喺度講，希望大家得閒嘅話都可以去支持其他運動，留意多啲出色嘅香港運動員，咁先可以令香港運動持續發展，令到香港嘅運動員得到更多尊重。
多謝你哋。
Text, Photo：陳肇鈞
原文刊於《運動版圖》2025年2月號
更豐富內容請支持印刷版或電子版！
