退休之後想做咩呢？｜鈞動敢言

今期討論吓，特別去到呢個年紀，觀眾或者朋友經常問我嘅問題：「退休之後想做咩呢Philip？」

其實我都相當避忌呢個問題，因為實質上我真係俾唔到任何答案。我都好想探索自己球場外嘅技能，不過足球員睇落好似好得閒，其實多餘時間唔多。喺香港做職業球員，又要四周圍去練波，練完波又要睇物理治療，甚至休息亦都係工作嘅一部份，要參與其他需要投入嘅活動唔容易，想讀書進修更不在話下。

大多數球員都係退休之後從事返足球訓練嘅工作，成功例子有我前輩陳偉豪，同陳肇麒，佢哋兩個嘅足球訓練班都搞得有聲有色，我亦都親自去過客串吓。其餘相關嘅工作有足球評述員，譬如有上一代嘅鄭兆聰、陳炳安等等嘅前輩。陳sir陳志康當年退休後慢慢進修，一步步做到足總董事團其中一名成員，再資深一啲有郭sir郭家明，今日已經係教練中嘅教練，非常之值得尊重嘅國際足協足球導師。山sir 山度士，今日職位係車路士足球學校總監。從足球員轉型做其他行業而結果成功都有唔少例子，我會諗起陳健安同蘇偉泉，喺生涯早期轉型做歌手或演員都非常之成功。

講返我自己，我耐性比較差，暫時對足球訓練嘅工作興趣唔係太大，哈哈。我亦都知道自己絕對唔係娛樂圈嘅材料。反而近期見到江旻憓退休之後喺馬會工作，感覺比較上同自己有啲關係，不過諗諗下又唔係太鍾意太被規限嘅工作。

當諗到自己可以做嘅工作，可能會偏向靠自己創意，同埋比較無規限咁開發自己嘅生意，當中會諗起吳逸凱同唐建文，分別發展飲品生意同埋男性護理用品業務。我會覺得比較自由，而且睇到佢哋真係鍾意自己每日做緊嘅事。

不過到最後，最重要都係搵到自己舒服、自己安心嘅定位。有時唔需要強求，因為喺起點嘅時候所設定嘅終點，到最後未必會係終極嘅終點。最緊要自己搵到鍾意做嘅工作，對得住人而交代到比自己，就可以啦。

Text, Photo：陳肇鈞
原文刊於《運動版圖》2024年12月號
更豐富內容請支持印刷版或電子版！