港英女足文化大不同｜征英女將 大家好，我係Karri，多多指教。第一期專欄，講吓香港同英國女子足球文化嘅分別。我依家喺英國逢星期二四夜晚練波、星期日比賽，其實同喺香港嘅時候差唔多。唔同嘅係英國放學時間比較早，所以唔洗放咗學即刻趕去練波，再加上呢邊生活節奏比較慢，所以感覺時間會充足啲。雖然比賽都係週末進行，但係英國嘅比賽時間主要都係晏晝，而喺香港可能因為好多人需要兼顧工作，所以比賽時間通常喺星期六日嘅夜晚。
