港英女足文化大不同｜征英女將

大家好，我係Karri，多多指教。第一期專欄，講吓香港同英國女子足球文化嘅分別。我依家喺英國逢星期二四夜晚練波、星期日比賽，其實同喺香港嘅時候差唔多。唔同嘅係英國放學時間比較早，所以唔洗放咗學即刻趕去練波，再加上呢邊生活節奏比較慢，所以感覺時間會充足啲。雖然比賽都係週末進行，但係英國嘅比賽時間主要都係晏晝，而喺香港可能因為好多人需要兼顧工作，所以比賽時間通常喺星期六日嘅夜晚。

當地人對女子足球嘅睇法同香港都好大分別。部份香港人可能依然有種刻板印象，覺得足球係男仔而唔係女仔玩嘅運動，或者依然會有「女仔踢波會腳粗」、「女仔踢波好粗魯」等等既講法。相反喺英國，可能同女子足球已經職業化有關，當地人聽到女仔踢波都唔會好surprise。英國每隊球會都會有幾個忠實fans，無論男子同女子隊嘅比賽都會見到佢哋，就算佢哋唔識啲球員，都會純粹為咗支持球會而嚟現場睇波支持。喺當地就算你問任何一個街上撞到嘅路人，佢都會有一隊自己support嘅球隊，嚟到英國可以話完全感受到，當地人的確好熱愛足球呢個運動。

Text、Photo︰陳頌文
原文刊於《運動版圖》2024年10月號