嫲嫲︱一波一轆

那天，我叫了很多聲嫲嫲，拍著她的肩膀，還傻呼呼的在她身旁邊哭邊跟她說話。十分鐘後，直至護士經過，我邊流淚邊問：「咁樣係咪正常㗎？」護士拍拍嫲嫲，叫了幾聲：「婆婆！孫女嚟睇你呀！婆婆！婆婆！」另一位護士摸摸嫲嫲的脈搏，掀開她的眼皮，說：「叫埋其他屋企人嚟。」我顫抖的哭着問：「佢仲聽唔聽到我講嘢㗎？」護士說：「佢仲有好微弱嘅呼吸同脈搏。你有咩想同佢講就講啦！佢聽到㗎。人最後走嘅係聲音。」如是者，我握著嫲嫲的手，跟她聊了三十分鐘。最後一次，玩弄著她「戙篤企」的頭髮和給了她最後一個擁抱。

一星期後，我們在教會討論安息禮拜的事宜。我主動請纓負責生平和影片製作的部份。這是我可以為嫲嫲做的最後一件事。我也很希望能藉着我製作的影片，親自安慰嫲嫲的親屬們。

安息禮上，我邀請了我認識二十年的朋友來，嫲嫲也認識她，也經常關心她的近況。沒想到，朋友滿臉淚水的跟我道謝，謝謝我邀請她來。翌日，她發給我一段文字：

「今日宣訓嘅金句：『…嫲嫲息了地上嘅勞苦，喺天堂享褔了。雖然如此，但刻苦，堅韌，和藹，耐心，無私嘅佢永遠都喺我同你嘅心入面。』同埋我喺你身上都睇到哩啲特質呢！

刻苦堅韌——喺運動員哩條道路跌跌碰碰，成日都會受傷同犧牲咗好多嘢，但係好少聽到你有怨言，更加冇講過話要放棄。

和藹——同你相處嘅每個人都會覺得好自在，同埋一開心笑塊面就會好似個壽包咁，好得意。

耐心，無私——不論係家人定朋友，你都付出100%真心，成日都會整手作同送禮物畀我。喺我唔開心嘅時候一定會抽時間陪我、聽我呻。喺嫲嫲嘅安息禮都睇得出你花咗好多心機寫文同剪片，留俾大家嫲嫲最好嘅回憶。

哩啲咁好嘅性格一定係嫲嫲同你相處嘅23.5年留低俾你嘅禮物，亦係佢87年人生種嘅其中一粒豐碩嘅果實。

喺我眼中同佢心目中你都係最叻最好嘅珊珊！♥」

在這23.5年與嫲嫲的相處中，我從來都沒有想過，原來嫲嫲把她最美的性格特質都送給我了。

我會帶著嫲嫲的刻苦、堅韌、和藹、耐心、無私、樂觀，繼續努力下去。

Text：程嬿珊
Photo：作者提供
原文刊於《運動版圖》2025年6月號
更豐富內容請支持印刷版或電子版！