生涯第一次帽子戲法兼反勝後感｜鈞動敢言

By 陳肇鈞, 14 四月, 2025

生涯第一次帽子戲法兼反勝後感｜鈞動敢言

原本諗咗兩個主題同大家分享。不過經商討，參考埋朋友意見之後，發現應該將上一場足總盃八強嘅感受用嚟做今期題材。

比較意料之外係，當日嘅賽果引起好多話題，亦都令朋友不停咁問我當日嘅感受係點。其實總括嚟講我都係咁樣答，比賽就係比賽，等於普通人返工，每一場波都要搏盡，都要做好自己本分。足球可能有少少唔同，去到比賽某啲階段可能要俾埋條命出去。球場英雄地，勝負可以代表好多嘢。我哋嘅生涯成功與失敗，有時係以我哋嘅榮譽同成就界定。

當日可能比較特別嘅，除咗倒戈令我感受更深，第一次帽子戲法兼連追三球反敗為勝，都係人生第一次，所以我都會好好記住呢一場波。我會將當日嘅match ball好好收藏。不過可以做嘅就係咁多，因為下一個挑戰好快就會嚟臨，去到三月呢啲位通常都係好緊湊，而且定生死，三月之後嘅聯賽排名都大概會決定，最終邊一隊有機會得到今年聯賽冠軍。所以雖然係難忘，但我真係冇時間去慢慢品嚐同回味足總盃八強哩場波。

有好多人話係代表作，我又覺得唔係嘅，因為我嘅生涯仲未完，我仲未感覺到自己開始老，我覺得自己仲有貨交，我相信將來會炮製更好嘅比賽比大家睇，哈哈。

冇錯，我踢嘅位置通常都唔容許我入太多波，通常都係一球起兩球止。練波嘅時候，的確有時會入好多波，但係都想講吓其實落到比賽，要入一球波係相當之難，對方球員一定會用盡佢一切嘅氣力去阻止你。加上比賽入面有好多唔同嘅壓力，明明可以入嘅波，有時都會打個折扣，明明練波吓吓都可以入，不過去到比賽就係咁岩射歪咗或者唔夠力，所以哩120分鐘真係好特別，對我嚟講，命中率出奇地高。

亦都想喺度講，各位隊友同職員相當落力。咁多主力缺陣之下，我一個人冇可能做到哩次反勝，要大家交出100%嘅氣力，先至可以喺輸緊兩球之下追返，最後成功晉級。