著靚衫唔容易｜源來如此

By editor, 04 十二月, 2024

著靚衫唔容易｜源來如此

今次想同大家講吓殘疾人士運動員著靚衫哩件事。

點解每次我哋殘疾運動員著咗靚衫之後一定會喺社交平台度珍而重之咁post出嚟？因為我哋殘疾人士著靚衫真係好、唔、容、易！

殘疾運動員平日練習，出街都會選擇穿著運動服飾，貪佢方便、鬆身、舒服。而每當我哋出席重要嘅場合如頒獎典禮、宴會等要選擇穿著比較隆重嘅服飾，例如西裝或者禮服，哩類型嘅服裝會比較緊身同貼身，而我哋會遇上兩個問題。

首先，無論我哋係坐輪椅、佩戴義肢腳架，又或者侏儒症，大部份「啱啱好」嘅服飾，我哋都要攞去改裝，先可以著。例如長短腳嘅朋友要改褲腳，侏儒症嘅朋友要改衫褲長度，佩戴腳架又或者係義肢嘅朋友，無論係褲或者鞋都要改裝，所以大部份靚嘅服飾，都冇得即買即著！

其次，由於大部份靚嘅服飾都係以緊身貼身為主，哩件事會令到我哋無論坐輪椅、戴腳架義肢，定還是侏儒症而屁股偏大嘅運動員，立即變成機械人！因為標準嘅緊身衣服，只會預計正常人嘅骨架以及肌肉去設計，當我哋著上嘅時候，會特別覺得不靈活，以及受限制，亦令有工具嘅部位(義肢腳架輪椅)會有撠住撠住嘅感覺。所以大家可能會見到我哋喺活動上面顯得好唔靈活，好唔自在。

所以並唔係我哋殘疾運動員唔喜歡著得靚，而係每次著得靚都會為我哋帶來好多嘅唔方便。當下次大家見到殘疾運動員著得好「四正」，大家絕對要大大力咁樣讚我哋著得靚，因為我哋為咗尊重場合，為咗令大家覺得我哋著得靚，付出好多嘅唔方便以及困難，希望大家多加欣賞。