一個人出行｜源來如此
大家想知道殘疾運動員係點樣出門嗎？
大部份殘疾運動員都會同團隊一齊出隊，所以喺行程同照顧方面都會比較足夠。
筆者效力咗香港代表隊十六年嘅時間，由於殘疾人羽毛球哩個項目以前並唔係咁多人參與，而且輪椅羽毛球都只有我一個人，所以經常會出現我一個人出外集訓或一個人出外比賽嘅情況。(筆者撰文時，正正是一個人到杭州出席羽毛球的國際活動)每次發生哩個情況嘅時候，便如臨大敵。試想像一個殘疾人士，要攞住兩件行李，一對拐杖，一部輪椅，再加上個球拍袋。換着你，你會點處理？
當然，去到機場後，到達目的地後，都會有好多人幫忙。但將物資由屋企運到機場，由機場再推出接送區等，都係要自已處理。所以要一個人自已飛，殘疾運動員都要好有計劃同要好醒目。
我每次出發前，都會預先睇熟晒啲流程，務求每個環節都有人會幫忙或接送。另外，出發前一定要確定自已有齊所有主辦單位嘅電話，有咩突發事情都即刻有人幫！
自己一個人出隊，特別係去比賽，有個好大嘅挑戰位。就係自己係自己老闆，起居飲食、報到、比賽、教練、開會，自己一腳踢。一個唔小心，瞓唔醒遲到，連比賽都冇得打，被人取消資格。
但係又咁講，每次我一個人自己出完比賽集訓，返到嚟香港，我都完全明白「身在福中要知福」，因為香港大部份嘅運動員習以為常都有團隊嘅保護，有團隊嘅支援，有團隊嘅資源。可以話基本嘅，應有盡有。但相對好多外國嘅運動員，佢哋乜都係要靠自己，由報名到安排行程、買機票、交通安排，到目的地後，要報到、check in、安排飲食，甚至冇教練要自己做埋教練等等。
所以愈多一個人出行嘅機會，就會愈明白團隊嘅可貴，亦會愈明白資源來得唔容易。
雖然叫人珍惜資源好老土，但係老土都係要做：大家要好好珍惜你哋嘅資源，唔係到有一日資源冇晒，後悔都嚟唔切！
