工作與假期｜源來如此

By DanielChan, 04 三月, 2025

工作與假期｜源來如此

踏入新一年，相信好多讀者都過咗個美好嘅假期。讀者們有無好好奇到底我哋全職運動員嘅工作時間，同埋假期到底係點樣？

作為一個體育學院嘅全職運動員，我哋每人每個星期至少要訓練25個小時，如果係一個著重細節嘅運動員，會去見運動心理學家、運動營養師，另外仲會花時間調理身體，例如按摩或者做物理治療等等，所以基本上每個星期會花大概35至40個小時喺你嘅「工作」上面。咁大家就會話：「咦？其實同一份辦公室嘅工差唔多咋喎」冇錯，時間上的確係差唔多，不過運動員就係每分每秒都要榨盡精力同體力去不斷超越自己。所以可以話哩一份係有工作時數上限嘅工作，並唔可以不停地OT。

咁到底運動員有冇假期呢？放心，我哋都係有假期嘅。一般運動員都係星期一至星期六訓練，而星期日就係假期。至於可以放嘅「長假」，亦即係打工仔一般所講嘅Annual Leave，我哋係⋯⋯冇嘅！教練一般會因應唔同運動項目嘅需求、賽季嘅需求，以及每年有咩重要比賽去決定每年我哋有幾多假期。一般嚟講，每年可能有一到兩次可以去旅行嘅連續假期，例如一到兩個禮拜不等，一般都係喺賽季完咗之後用作叉叉電。運動員係甚少可以決定自己假期係幾時放同放幾耐。如果嚟緊嘅賽季有大比賽，假期可能相對會比較少同短。以我為例，喺2024年有巴黎殘奧會哩個大型比賽，所以自2023年開季到2024年嘅巴黎殘奧會為止，我只可以享有一個連續五日嘅假期，因為怕太長嘅假期會令我哋嘅狀態有所下滑，亦怕會令到我哋技術以及集中力冇咗連貫性。

好多人覺得運動員係一份筍工，可以免費周圍旅遊。實情並唔係咁樣。一來我哋嘅假期比正常打工一族少，二來一般我哋飛出去集訓或者比賽，係唔會設有觀光時間。以殘疾羽毛球隊為例，我哋通常會喺比賽前兩日到達當地適應時差、天氣、場地等等。比賽前我哋為咗避免有任何意外，又或者唔集中，所以唔會周圍觀光或者亂食嘢。而喺最後一日比賽(決賽)後嘅當晚，又或者隔一日嘅朝早就會回程，所以最多係可以喺當地食一餐好嘅晚飯，然後就要準備回程。所以儘管我哋周圍飛，其實我熟悉嘅只係世界各地嘅機場、酒店、羽毛球場。世界各地嘅風土人情、風景、美食，我哋都係以運動員身份外出嘅時候感受到。

隨著我慢慢會喺運動員嘅身份退落嚟，睇嚟我會有多啲嘅假期可以同屋企人去唔同嘅地方旅行，好好真正咁享受吓每個地方嘅美食、遊山玩水，彌補返每次經過唔同國家而錯過接觸嘅人同物。