自己的事自己做︱源來如此

由成為運動員開始，我就被告知殘疾人士運動發展要靠健全人士持份者去支持，不論財政、行政，還是策劃上，都會倚賴健全人士團體，或者健全人士嘅力量去為我哋爭取以及規劃。喺我超過十六年嘅運動員生涯中，每次遇上各種問題，心裏第一個想法就係：佢哋唔係殘疾人士，梗係唔會明白我哋嘅難處啦？咁點樣制定到真係適合我哋嘅政策呢？

久而久之，哩個問題問得多，心裏又會出現另一個聲音：既然覺得人哋唔可以為自己制定適合嘅計劃，咁點解自己嘅事唔自己做呢？就係因為咁樣，我決定咗去學點樣喺唔同嘅體育機構，以及國際總會裏面為自己嘅項目、為自己嘅運動去做規劃以及發聲。由2011年開始，我已經在國際羽毛球聯會裏為殘疾人士運動員委員會做亞洲區聯絡人，幫助一啲唔會上社交媒體，或者唔識得英文嘅國家，傳達國際羽毛球聯會嘅訊息。

然後從2017年開始，連續八年我都喺世界羽毛球聯會裏面擔任殘疾人士運動員委員會委員一職，負責為全世界嘅殘疾人士運動員發聲，將佢哋嘅聲音傳到國際羽毛球聯會中，亦將國際羽聯嘅訊息帶到每個運動員嘅手上。喺哩八年裡，我不單止更加清楚明白一個國際運動項目總會嘅運作、財政狀況、行政、對未來嘅規劃等等，更加透過同唔同嘅運動員聯繫及溝通，透徹地了解各種運動喺世界各地嘅發展狀況，例如羽毛球哩個項目喺亞洲極為盛行，根本上唔使為哩啲國家嘅運動員去爭取福利或者資源，但喺南美洲、非洲，甚至大洋洲羽毛球嘅發展都不如歐洲亞洲咁盛行，大部份殘疾運動員都喺無資源嘅情況底下，要用自己嘅錢去養活自己嘅職業生涯。所以作為其中一個持份者，我更加明白將適當嘅資源放喺適當嘅地區，及適當嘅人手中是十分重要。

喺剛過去嘅四月，筆者有幸被國際羽毛球聯會委任為新一任嘅殘疾人士運動員委員會主席，並身兼國際羽毛球聯會理事會理事。擔此重任，除咗可以為殘疾人士羽毛球哩個項目推動更多之餘，作為理事會嘅理事，更要負責健全人士羽毛球嘅發展，為所有羽毛球運動員發更多嘅聲音。哩個就正正解決咗我最初做運動員時嘅謎團：係唔係只有健全人士先可以幫助殘疾人士嘅運動發展？

只要我哋想，自己的事應該自己做，健全人士可以肩負健全人士及殘疾人士嘅運動發展，同樣地殘疾人士亦可以為殘疾人士運動發展，以及健全人士嘅運動發展出一分力。咁樣先至係一個冇分你我嘅運動推廣。

好多時，大家會覺得為你發聲嘅人唔清楚你嘅需求及狀況，係唔可以代表你發聲。與其埋怨，不如落落實實咁踏出一步，為自己想爭取嘅理念出一分力，實行：自己的事自己做！

Text：陳浩源
Photo：作者提供
原文刊於《運動版圖》2025年6月號
更豐富內容請支持印刷版或電子版！