運動員與「牠」｜源來如此

By DanielChan, 29 四月, 2025

運動員與「牠」｜源來如此

認識我嘅人，都知道我喺香港大部份時間都同我寵物黐埋一齊，好多人認為我好愛寵物，但係大家唔知嘅係其實寵物喺我成個運動生涯入面幫咗我好多。

喺2013年結婚之後，好快就同我太太都希望屋企裏有一隻寵物，然後就擁有咗屬於我哋嘅第一隻寵物——柴犬Kero。佢個名嘅來源係因為我太太好喜歡一套日本動漫〈軍曹Keroro〉。可能有人認為運動員已經有好多好多時間要訓練、比賽，再要抽時間去陪伴寵物，實在好困難，但大家有冇諗過，其實係寵物陪伴我哋呢？我每日都被好多好多嘅壓力包圍，包括訓練水平、比賽成績、資源分配、未來前景等等，每次都想搵人去傾訴、聆聽，一般嚟講我太太做咗哩個角色，但係其實Kero都係。做運動員每日都有好多說不出嘅難，說不出嘅苦，如果有一個穩定，又唔會嫌棄你嘅聆聽者，實在可以令我經常穩定情緒以及清空負能量，重新能量滿滿咁開展另一日嘅訓練。

當東京奧運仲有一個月開始嘅時候，Kero突然之間離開咗，我仲記得當時每日都以淚洗臉，但又要訓練，所以每日只可以返到體育學院訓練後匿喺車度喊一段，然之後抹乾塊臉出去又繼續訓練。喺冇咗寵物嘅哩兩年時間，可以話係我人生其中一段最唔如意嘅時間，我發現我成績冇咁好，脾氣又差咗，好似同人嘅相處都差咗。

當你知道有一個「親人」，每日都會喺屋企度等你，會無時無刻聆聽你訴苦、投訴，會每日無時無刻咁樣陪伴住你、每日都係笑面迎人咁對住你，原來可以令到我每一日每一刻都充滿力量，而哩個亦係令到我每一日都可以開開心心咁迎接每一個新訓練、新挑戰嘅動力來源。

所以經過深思熟慮後，喺2023年嘅春天，我哋迎嚟咗Tama，大家都可以想像到，個名都係源自Keroro系列入面嘅Tamama。自從Tama嚟到之後，佢嘅百厭、頑皮同佢個破壞力都令到我同太太有少少受苦，但係佢嘅陪伴、可愛，以及每時每刻都需要我哋嗰個倚賴感，係令我覺得每一刻都被愛包住。唔講你唔信，自從Tama 嚟咗之後，我嘅運動表現有所提升，我嘅自信亦有所提升，同時間不論係同隊友、教練，定還是同其他人嘅相處都好咗。可能家入面重新出現「對的人」，令到我成個人都輕鬆晒，同埋舒服咗。

經常有好多人問我，運動員壓力咁大，有乜嘢可以幫助減壓？其中一個減壓嘅秘訣就係，將我所有嘅唔開心、投訴，都同我隻狗仔傾訴，然後好好攬住佢放空。自然地，壓力同埋唔好嘅諗法就會走咗，然後我就可以喺冇壓力嘅情況下做啲啱嘅決定。好多人話做運動已經夠忙，自己都未搞得掂，仲邊有時間照顧寵物？其實搞唔搞得掂，係睇吓你有幾愛，同有幾需要啫。所以強烈建議各位運動員，如果你係鍾意小動物，而時間同地方允許嘅情況底下，不妨考慮養寵物，除咗多一個「親人」愛你之外，話唔定你嘅運動成績都會因為咁樣而有所提升。