關於港 我想說的是⋯⋯人生唔係一條直線,而係一個又一個港口——馬倩宜

關於港 我想說的是⋯⋯
人生唔係一條直線,而係一個又一個港口——馬倩宜

比賽完,無論贏定輸,都係一個港口。你停低、補給、然後再出發。

我以前唔係咁諗。每次比賽完,我淨係望住個結果:贏咗就鬆一口氣,輸咗就自責。個港口,變咗一個審判台。直到我發現,原來港口唔係終點,係下一次啟航嘅地方。

暴食症嗰段時間,我以為自己困咗喺一個死胡同。但而家睇返,嗰個低谷,其實都係一個港口。佢逼我停低,面對自己,認清自己真正想要、真正鍾意嘅嘢。亦都逼我去搵新嘅方法——更加適合自己嘅方法。

如果冇嗰個港口,我唔會知原來自己享受嘅係運動員嘅生活態度,而唔係淨係企上台嗰一個獎。
如果冇嗰個港口,我或者拎唔到咁多世錦賽冠軍。
如果冇嗰個港口,我都唔會咁明白學生嘅感受。

每一個港口,都係為咗下一次啟航做準備。而家我教學生,都會同佢哋講:
* 唔好怕比完賽,或者完咗一個目標之後嘅空白
* 唔好怕嗰種「倒退期」
* 因為嗰個港口,正正係你消化、成長、再出發嘅地方

香港係我嘅根,健美係我嘅船。而每一個港口,都提醒我:唔使急,補給好,再行落去。你而家喺邊個港口?停低唔緊要,最緊要記得——你仲有下一趟航程。一齊加油!

關於港 我想說的是⋯⋯人生唔係一條直線,而係一個又一個港口——馬倩宜

Text、Photo:馬倩宜
原文刊於《運動版圖》2026年11月號
更豐富內容請支持印刷版或電子版!