馬拉松攝影寶典｜Behind The Shots
渣打馬拉松係每年最多本地跑友參與嘅賽事，我好鍾意去拍攝渣馬，因為可以為跑手記錄喺賽道上比賽嘅情況，今年我只有一個任務，就係喺起點影嘉賓嗚槍，之後就可以自由發揮，我計劃咗去四個地方拍攝，所以選擇輕裝上陣，只帶兩機三鏡加一條梯。挑戰自己體能同埋時間分配。
西隧口初段人群較少，容易影到個人相，圖中為KOLOR 主音Sammy，跑步之餘仍不忘回應橋上觀眾支持。
與環境配合
頭站係喺柏麗大道影起步。因為有好多傳媒，所以要早去佔據有利位置，途中拍攝跑手熱身、花絮。跟住就要上記者台呆等。差不多到達開跑時間，嘉賓先會出現。因為嘉賓唔會等太耐，出場兩分鐘左右就起步，所以要把握時間影大合照。起步時要拍攝嘉賓，同時又要拍攝跑手，所以最好有兩部相機，長焦同廣角齊用。影完重點全馬起步，就開始要走位。由於上年即刻跟傳媒車去銅鑼灣影衝線，所以今年選擇先喺彌敦道唔同位置拍攝。因為剛起步無耐，跑手們會表現出有力氣、好有決心嘅狀態。另外因為天黑，所以可以利用現場燈光做一啲唔同嘅構圖。
龍和道近金鐘可以拍攝到IFC等中環特色。
挑戰時間分配
到七點全馬起步後，已經拍攝到五組唔同位置嘅照片，就可以去食個早餐、補充體力，跟住行過西隧口再戰。去到西隧口初時，參賽者唔多。慢慢大軍殺到，撳掣都撳到手軟。點解選擇西隧口？因為呢個位置跑手們仲好有力氣，人潮亦無彌敦道咁密。跑手們遠處已經可以見到鏡頭，準備堆出笑容拍照。
中環龍和道，其中可以拍攝到摩天輪背景。
到八點左右，西隧口太陽未到最高，屬於側光，選手們更立體。我嘅自定時間到就即刻離開，趕去第三站龍和道。呢個時候大部分半馬參賽者已經完成，剩低已經係全馬參賽者。選擇呢個位主要係想影中環嘅地標。不過呢個位已經接近尾聲，所以部分人會選擇緩步前進。要影有氣有力嘅相比較難。所以影左三十分鐘左右就離開，向終點進發。
早上側光令跑手們更有立體感。
本來預定去到銅鑼灣先上電車拍攝，但最後驚車上無有利位置拍攝，所以由金鐘已經上車，選定車上位置拍攝。去到銅鑼灣見到人頭湧湧，將已經構思好嘅構圖盡量實行。之前計劃有人群同電車，希望表現到香港特色。可惜後面未有電車。但由於交通燈時間長，後面架車居然追上，仲配合去到我希望出現嘅位置。而車內乘客亦配合，令我影到預期嘅相。根據上年經驗，如果維園落車會好難行返銅鑼灣，所以選擇去到天后，再搭電車返去，用唔同角度再影多次。返到銅鑼灣再去駱克道，睇下仲有無龍尾人潮相可補。下午十二點正式收機，完成七小時拍攝。今年拍攝大致順利，不過氣氛始終不及以前，幾年前賽道兩旁會帶好多觀眾為參賽者打氣。上年開始左封右封，令市民同選手們互動減少。以前最多人嘅西隧口、龍和道同灣仔碼頭都無市民可以打氣。令整個賽事氣氛失色不少。
由金鐘搭電車到銅鑼灣，由電車上層拍攝。剛好尾隨嘅電車顏色同今屆馬拉松顏色接近，令到畫面比較配合，預期要影嘅相Get！
Text、Photo：Olddog
Design：Yvonne
原文刊於《運動版圖》2024年3月號
