LGBTx運動：愛的激盪

LGBTx運動：愛的激盪

如果說精英運動員的堅持是出於對運動的熱愛，那麼業餘運動員對運動的愛更純粹：贏了比賽不會獲得獎金、資助或政府支持；而且就算是以「香港代表」的身份去外國比賽，也100%要自費。曾代表香港參加2018年巴黎Gay Games的劉漢森Ray，更在香港的私人工作室添置不少劍擊裝備，在同志群體中推廣劍擊運動。這一切只有一個答案，他說：「因為我鍾意劍擊！」由此激盪出他對Gay Games的投入與熱情。

愛是推己及人

Ray大學時期接觸劍擊就愛上這項運動，到畢業後更繼續在私人劍會練習，可惜劍會並無開辦重劍成人班，於是他原本想玩重劍亦只好轉而報佩劍成人班，而這卻成為他參與 Gay Games的起點。「我當時玩咗兩年就膽粗粗報總會嘅新手賽 ，僥倖有成績，所以就keep住玩唔捨得放棄。到了2014年知道有Gay Games，有香港人攞獎，就開始留意Gay Games。到16年知道香港申辦Gay Games，就諗住喺2018年巴黎Gay Games中報劍擊，但他們的劍擊項目只得重劍沒有佩劍，結果我又臨急臨忙學重劍。」兜兜轉轉，Ray還是回到重劍，大費周章的原因也很簡單：「參加這個比賽都有多啲曝光，希望透過呢啲曝光，有多啲人去正面認識LGBT呢個群體。」

他直言：「我想支持 Gay Games所以去參加，而咁多項目當中我最有信心始終是劍擊，雖然佩劍和重劍好唔同，但準備都方便過其他項目嘅！」佩劍只需刺中或劈中攻擊範圍就可得分，而攻擊範圍包括上半身的頭、手和背部，因此攻擊方法頗為靈活；重劍則需要用力刺中對方身體，加上攻擊範圍包括身體任何部份，看似重劍的攻擊方法最為簡單直接，但因重劍的劍尖需要一定壓力才能令裁判燈亮起，因此對力量、速度和準繩度要求更高。Ray笑言：「打重劍要望空，但有時睇得到空位都唔係咁容易拮得中。」雖然如此，為了去巴黎出戰，他也付出不少努力苦練，平時很少健身也為此去做健身操fit體能，也積極參與本地賽事，寓賽於練。

同路同行

Ray認知自己性傾向時已是踏入職場的成年人，他認為是因為青少年時期對性向的認識不多，因此也希望社會風氣更開放後，令更多人可以早點了解自己。此外，雖然他並無刻意隱藏性向，卻習慣低調，對身邊的閒言閒語也並非完全無動於衷，尤其他任職教師，身處的工作環境相對較保守：「巴黎Gay Games之後有學生從新聞見到我，但我無去睇Social Media 嘅留言，唔希望畀一啲言論影響自己。」不過，巴黎 Gay Games也算是他出櫃的契機，除了有學生留意到，他爸爸亦似乎透過親戚得知：「當時參加哩個運動會都預咗畀人知，預咗自己會曝光。所以感覺上參加這個運動會都算係出櫃嘅契機。親戚都有留意到，我估爸爸就係咁知道咗，當時有打電話問我係咪去巴黎，之後幾個月都無打電話畀我。」

今年他再度參與Gay Games，身份略有轉換，成為劍擊項目的協辦負責義工：「難得喺香港搞，我一定要參與，希望透過推廣同樂運動會，讓大眾認識多啲，起碼第時大眾接觸到嘅時候，講嘅說話都無咁難聽。」在運動賽事中，最公平就是憑實力說話：「性少數眾同普通人都係無分別，好多都係一樣有工作、都會做運動，大家都係有正常生活，只不過大家選擇嘅伴侶唔同，大家鍾意嘅嘢唔同。」

原文刊於《運動版圖》2021年7月號。