唔用粗囗寫作系列—謠言（上）｜Road To Paris

大家有冇試過畀人誤解？得到一啲自己感到與事實不符嘅負面評語？如果你冇，恭喜你，你好幸福，我為你感到非常高興！但如果你有，唔驚，我都有，你並唔孤單！

十四歲嘅時候，我第一次入體院訓練，因為怕羞唔敢同教練打招呼，結果被教練話我「寸」（編注：粤語態度傲慢之意)。到大學宿舍面試當中， 我希望表現得自信一點，結果又畀人話寸。

細個當然會覺得好似被人誣衊，好唔開心，有種耿耿於懷嘅感覺。更不堪嘅係哩啲評語係唔會停留喺一個人身上，而係會散播出去，令到你社交圈子內嘅人未認識你已經對你印象唔好。一舉一動都有人話你寸、話你人唔好。教練可能會唔鍾意你，隊友可能會唔鍾意你，同學可能會唔鍾意你。救命！諗返起都唔安樂！我唔係想討好全部人，但起碼唔好全世界都唔鍾意我先啊！我諗中學至大學初期係我比較迷失，好在意但又唔識改變其他人睇法嘅時候。

到大學住宿尾段我諗通咗啲，反省過自己，亦意識到自己的確有不足之處先會引來誤解。從樓友身上我學識咗點樣留一個好啲嘅第一印象畀人——可能多啲主動同人打招呼，說話盡量客氣啲，用詞得體啲，試吓風趣幽默啲。相處都係一門學問。即使你清楚自己為人，自己嘅原則，自己想表達嘅中心思想，勇於表達自己固然重要，但亦要時刻提醒自己適當地從聆聽者角度出發，否則其他人好有可能吸收唔到你想表達嘅內容，亦有可能會誤解你嘅為人。當然對住朋友可以隨心所欲少少啦，但偶爾都要顧及佢哋感受，為你哋嘅溝通搵到一個舒適嘅平衡點。

離開大學生活冇幾耐，我就踏入全職運動員生涯。一心諗住改變自己，定能夠徹底改變其他人對我嘅睇法。少咗畀人話寸，可惜，又有新嘅誤解光臨。

「點解啊？點解啲人要咁樣講？！係咪痴beep咗線？」哩句說話我同朋友傾訴必定出現。我的憤怒指數100%。其中最為深刻嘅一個謠言發生喺爭取出線東京奧運會期間。
「蔡俊彥去完廁所唔沖廁」
講笑。其實係......

下回分解(邪惡emoji)

Text, Photo: 蔡俊彥
原文刊於《運動版圖》2024年4月號