練習日記—動漫人生(15/6/2025)｜Road To Mars

今日一早10點從香港搭飛機去印尼峇里打亞洲錦標賽！

我一直對今年哩個比賽都十分期待，因為我人生第一次出戰國際賽事，就係喺峇里！

記得當時係亞洲青少年錦標賽，我只得14歲，需要出戰少年組(17歲以下)嘅賽事。初出茅廬，入到場館戰戰兢兢，記得見到韓國隊覺得佢哋隻腳好快，日本隊隻手同腳都好快⋯⋯中國隊冇出隊，爽！希望第二日佢哋快啲輸晒，唔使同佢哋打⋯⋯

點知一出小組名單，又有韓國，又有日本，點算？！？！？！唯有動漫人物上身。動漫一直宣揚熱血精神，遇到強敵要興奮，咁先可以遇強愈強。唔爭在，我打埋個電話同媽咪講：「如果我今次比賽贏咗冠軍就轉全職！」超級熱血。

古語有云：「人生如戲！」但我就人生如動漫。比賽當日，動漫角色上身，我先贏日本選手5-1，再贏韓國選手(唔記得比分)。跟住小組全勝，殺入八強，抽筋，大鑊！動漫情節再度上演，抽住筋驚險反勝韓國選手。入四強，戰勝自己隊友。入決賽，經已進入忘我境界，超水準大炒日本選手15-7，贏得冠軍！！！

我：「媽咪，我要轉全職！」

媽咪：「唔得。」

基於當時社會風氣並不太支持運動員，媽媽不兌現承諾，尚算合理的。於是我套動漫人生需要暫停播放一段時間。返到香港，要抽離動漫角色，回歸現實，溫書考試⋯⋯

時隔十二年，再度置身峇里。酒店唔一樣，但比賽場地一樣。走入比賽場館，一切並唔陌生，每一個當年嘅比賽畫面，都歷歷在目。一模一樣嘅訓練館，一模一樣嘅決賽台，一模一樣嘅頒獎台。嘩，咁就十二年啦，原來哩度就係我劍擊生涯嘅其中一個起點。(起咗個雞皮)

十二年後，我帶住更成熟嘅心智再次進入賽場，唔再害怕任何選手，但有一樣嘢不變，動漫精神依然在我血內流動！！！估唔到十二年後，我嘅動漫人生仍在播放！太幸福了吧！

希望幾日後會係一套青春、熱血、happy ending嘅動漫啦！

順祝各位香港劍手取得好成績。

Text：蔡俊彥
Photo：作者提供
原文刊於《運動版圖》2025年7月號
更多豐富內容請支持印刷版或電子版