JYD - 運動與生活注入了Hip Hop

Hip Hop是Fashion和音樂潮流文化，與運動搭不上邊？玩Hip Hop好低俗？要專注訓練才是愛運動？運動員不應該做生意或拍廣告？這些常見的刻板印象或偏見，正正令到JYD想透過音樂和生活態度提出質疑：為何我們要被定義該是什麼模樣？「我覺得Hip Hop係一種堅持忠於自己嘅精神，貫徹喺我嘅生活同埋對運動嘅態度上。」

當籃球遇上音樂

「Hip Hop好容易令人聯想到籃球。」

經常觀看NBA賽事的球迷或許早已留意到，播放賽事精華片段時的背景音樂很多時都是Hip Hop；還有球星打扮、籃球場的塗鴉文化等，都與Hip Hop關係密切，JYD更指出，很多球星亦是說唱音樂人，Shaq O’Neal、Damian Lillard、Miles Bridges等等都有出過碟：「他們球打得好，Rap都唔錯，可能係因為節奏感好嘅天賦啦！好少人知嘅係Kobe都有出過碟，不過佢係Rap意大利文，全碟只有一兩首係英文。」對他來說，籃球和Hip Hop亦是剛好成為他的愛好。

JYD中學開始打籃球，做音樂則是他自小的夢想，沒想到這兩項竟都不止是興趣——2016年他重拾音樂夢，成為Rapper，而籃球這項運動更對他的人生哲學和價值觀影響甚鉅：「我嘅偶像Kobe Bryant，佢嘅曼巴精神一直影響我；無論我做其他運動，又或做音樂、返工，籃球帶俾我嘅一切都根植其中。」例如堅持和團隊精神——他很佩服Kobe的勤力和毅力，引以為鑑，而團隊間的互相信任和依靠亦是他所重視——這些都令他在做音樂的路上，以至在餐廳工作時，陪他堅持至今。

除了成為本地說唱組合「黃禍」的成員之一，他亦在素食餐廳The Park by Years中找到自己的天地：「老闆和我都鍾意打籃球同Hip Hop，佢哋亦樂意喺店中加入很多個人喜愛嘅元素，今年新開設嘅品牌選物店Shop at Years亦都好順理成章咁出售佢哋自己都感興趣同喜愛嘅品牌或物品！」所以，店中有整面牆嘅唱碟出售，不少都是Hip Hop作品，當然更少不JYD的恩師MC仁及LMF的作品；此外更有一角售賣老闆們和他都會看的書：「除咗有關於素食和音樂嘅書，都有我好鍾意嘅印度哲學大師Jiddu Krishnamurti嘅書，同埋我偶像Kobe Bryant、李小龍嘅書！」

當音樂遇上運動

「Come on Everyone Let’s Get It Done
邊到跌親 邊到起返身」
節錄自《Game Time》(詞、唱：JYD)

愛籃球的人做音樂，將音樂帶回他喜愛的運動，似乎理所當然得像使命，也是榮耀。2018年的籃球學界精英賽JYD獲邀為大會打造主題曲，由他作詞和主唱，他便很想將他心目中的運動精神貫注其中：「我好認同Kyrie Irving “Hungry and Humble”嗰個精神，提醒自己要時刻Stay hungry, stay humble，保持住對追求進步嘅渴望，亦都唔可以太容易自滿。」歌詞說「邊到跌親，邊到起返身」，就是充滿這種不輕言放棄的精神，的確很適合在熱血的學界賽事中激勵球員。

這首歌令他回想起中學的「波牛」年代，那時候好像不打籃球會死似的激情卻日漸變得遙遠，他曾在傳媒人球隊Mediators中一起練波的日子，也已暫停：「我依然喜歡籃球，公餘時都會去附近嘅楓樹街球場打波，但始終無法定期去和隊友練波，不想空佔著位子。」他笑言：「待手頭嘅工作上軌道便會得閒些，I will be back！」

團體運動因工作忙碌而難以延續，他迷上做Gym，個人時間安排較有彈性，同時亦是新奇的挑戰：「我係2020年開始做Gym，那年Kobe去世，我想延續佢嘅精神，測試下自己嘅極限喺邊。初時都試過wakesurf及其他水上運動，但最後都係最鍾意做Gym。」器械健身對他的魅力，可能是重量、次數等可以量化的目標，令他更有追求進步的動力，也可以更清晰地知道自己的極限在哪：「我一星期做兩日Gym，初時見到Programme 會質疑自己做唔做到，直至每次做到好攰之後，都會想再試下可唔可以繼續！」這是一脈相承自做籃球的執著：「我做音樂和運動的共通點，就是袋住hungry和humble這兩隻字，不斷追求進步，哩個亦係我延展至工作同生活嘅一個態度。」

生活有Hip Hop

「人類自誕生就用血統膚色區分
點可能 Imagine 個世界會As One」
-    節錄自《戰爭罪行》(黃禍)

由籃球談到音樂，縱是說著喜愛的事物，JYD說話時語氣平緩，一點也沒有給人「叛逆」感覺，他笑言：「Hip Hop雖然給人總是在評擊時弊或什麼嘅感覺，但Rapper也不總是忿忿不平，都有人寫愛情或者其他題材啦！」早前黃禍推出新作《戰爭罪行》，便是對戰爭帶來的動亂有感而發，他負責編寫其中一段Rap，坦言靈感來自John Lennon同樣以戰爭為題材的作品《Imagine》，希望大家破除刻板印象帶來的成見，便可以減少紛爭：「人類太缺乏愛，太多批判，太多負能量，點unite as one呢？」這種感歎除了源自他自己的經歷，他亦因為身邊的運動員朋友而留意到大眾眼光對運動員的「枷鎖」：「有人會說運動員為什麼要接廣告？質疑佢哋不務正業、忽略訓練本份云云，真在可笑！運動員在訓練以外嘅私人時間為何不可以做其他事呢？難道不能有娛樂、不能食飯？」他以NBA球星字母哥Giannis為例，他在social media上放家庭照，難道就代表他沒有訓練嗎？

他希望藉此提醒大家，要懂得欣賞身邊的一切，減少不必要的批評。「好多人可以好輕鬆好簡單咁，不負責任地上網批評留comment，咁就抹煞咗別人嘅努力。但佢哋又未必真係好了解事件係點、人哋做咗咩。」愈多人批評，他愈提醒自己別被負評打垮，「與其咁執着，不如將佢變成動力——因為多人眼紅你先會去抨擊你，令我更加知道自己係做緊一件啱嘅事。」

回到最初的問題：Hip Hop精神是什麼？他認為不只是批判，而是對世界的洞察，「我認為人生有不同階段，每個人都會有唔同原因作出一啲選擇，並無絕對黑白，所以我唔想花時間去評價別人、糾纏喺輸贏上。日日罵都不會令佢哋有進步，對吧？與其係咁，不如專注喺唔同崗位上點樣做一件事。」對他來說，這種洞察的精神已注入了他生活中的不同面向，包括工作和運動，成為他的重要一部份。

Text: Nicole
Photo: Olddog、受訪者提供
Design: Yvonne
(完整封面故事收錄於《Sportsoho運動版圖》2022年9月號)