從不聞不問到街知巷聞｜源來如此

By DanielChan, 06 二月, 2025

從不聞不問到街知巷聞｜源來如此

近年，聽到愈來愈多市民談及或討論殘疾運動員。多咗人喺街度認得我哋，甚至開始有唔同活動、商業邀請等等。市民對殘疾運動嘅投入度、熱度以及討論度實在係歷年嚟的最高點，作為運動員，實在喜出望外。

同其他人談及歷屆殘奧，大家都知道香港隊有好好嘅成績，但當要佢哋講吓有咩運動員，大家可能只會講到蘇樺偉、余翠怡等七金、六金名將，而其他運動員大家認知都唔多，更遑論會認得你個樣。

到底點解差別會咁大呢？

筆者認為一切轉變來自2021年東京奧運開始。首先因為疫情令大部份市民都困在香港不能外出旅遊，亦因此令大部份市民少咗娛樂，而觀賞奧運及殘奧就取而代之成為佢哋其中一個娛樂。另一方面，當時社會上鮮有好消息，而運動員喺奧運及殘奧上面獲取好成績就係大家引頸以待嘅好消息。所以運動員嘅討論度以及關注度咁高，疫情可能係其中一個「幫手」。

而另一個幫手就係政府購下奧運以及殘奧會的轉播權，特別係殘奧會，一路以來市民對殘奧運動嘅印象只係停留喺印象，好多人會用唔刺激、冇速度、冇力量、唔流汗等等去形容殘奧會嘅運動，但係確確實實有冇人完完整整睇過一場殘奧會運動比賽？如果冇，啲評語又係邊度嚟嘅呢？正因為2021年東京殘奧會有電視直播，所以市民先有機會可以正正經經咁坐喺度睇一睇到底什麼是殘奧會運動。

「咦，原來都好難㗎喎！」
「原來都好講技巧㗎喎！」
「嘩原來都好辛苦㗎喎，比健全人士運動更加嘥力！」

2021年開始，我已經聽過無數次哩類型嘅評語。原來之前大家只係因為未睇過殘奧會嘅運動，所以先對殘疾人士運動唔理解，當市民親自接觸過，睇過之後，原來佢哋都覺得刺激，原來佢哋都搵到可賞性。所以有電視轉播，對一個運動嘅推廣係極之重要！而最後一個幫手，就係香港奧運會代表團。正正就係因為香港奧運代表團破紀錄地好成績，令到市民沉醉於運動熱潮裡面，以致佢哋嘅熱情大到「不如我哋支持埋殘奧會！」「殘疾運動員都係香港運動員！」

就係因為咁，2021年殘奧會成為其中一個，亦可能係第一個大家開始追捧殘疾人士運動員嘅舞台。當然，要令市民值得追捧，殘疾運動員本身嘅努力以及驕傲嘅成績先係最重要嘅原因，外在因素點樣多，如果自身唔努力，結果做唔出那份「香港精神」，香港市民都係唔會收貨！

2024年完結，新一個奧運周期又開始，希望香港殘疾人士運動員可以繼續保持佢哋嘅好成績，而市民亦保持佢哋對運動以及運動員嘅熱度以及關注度，希望到2028年洛杉磯殘奧會之後，市民可以叫得出、認得出每一位參與殘奧會嘅殘疾人士運動員。