忍口非懲罰而是重拾快樂｜健身健心

經常會有學生疑問：「Happy，你唔係話忍口愈忍愈唔開心咩？」我要澄清返先：「死忍」會唔開心，但如果知點解忍、點樣忍，忍口其實可以令你更容易開心。

我用自己嘅慘況解釋返。我以前暴食症嗰陣嘅慘況：見到嘢食，未必覺得好食，但就好想放入口；一有時間就想食嘢，有時甚至食到嘔。我以前臉上一點點紅色，就係因為嘔到爆微絲血管。真係好痛苦。最痛苦係：忍唔到。

覺得自己好失敗？係。
覺得自己好軟弱？係。
覺得全世界得我咁樣？嗰陣真係覺得係。

直到我察覺到：唔得，我要搵方法改善。之後我發現咗一個關鍵：多巴胺耐受性。

即係食甜嘢、精製食物時，大腦會釋放多巴胺，令人有即時幸福感，本身係好嘅，好幸福。但問題來了：你有冇試過以前食兩粒糖就好幸福，現在食兩粒糖完全冇感覺，要食多啲、再甜啲，先 feel到少少開心？

多巴胺耐受性就好似食抗生素，食得太多次，身體會產生抗藥性，以致抗生素已經對身體冇作用。身體對多巴胺亦係一樣，同一個份量嘅多巴胺已經唔夠，變相令人更難感開心。

重點來了：
忍口點解可以令你更容易開心？

想像你嘅多巴胺系統好似一個音量掣，長期暴食模式就如音量長開到10，細微嘅快樂(例如食一粒糖)，等於完全聽唔到聲。要將音量開到好大聲(食好多糖)先feel到。忍口就如將音量慢慢較返去3，更容易感受到細微嘅快樂，例如食一粒糖就覺得好甜好幸福，就連唔係來自食物嘅快樂(例如做運動、睇八卦)，都感到開心。

簡單來說忍口係幫你較返低基準線，令你更容易開心。所以忍口唔係懲罰，而係reset！

我當年做法分享：

1 了解原因 → 原來我唔係軟弱，係多巴胺負荷飽和咗
2 唔係死忍 → 而係慢慢減，俾身體適應
3 搵替代快樂 → 做運動有助身體釋放安多酚、睇八卦雜誌有助釋放開心荷爾蒙
4 享受返細微嘅快樂 → 原來食一粒靚朱古力都可以好幸福

現在嘅我可以喺比賽台上展示肌肉線條，同朋友分享甜品而唔會失控，365日都可以開心輕鬆keep fit！

你而家嘅多巴胺音量掣，係set咗去幾大聲？如果覺得生活愈嚟愈難開心，可能唔係你嘅問題，而係你個掣set得太高。你想繼續set喺10，定係試吓較返去3，重新享受細微嘅快樂？試吓慢慢較返低少少！一齊加油！

Text：馬倩宜
原文刊於《運動版圖》2026年4月號
更豐富內容請支持印刷版或電子版！