手球聯賽男甲兩強對決 南華力壓EVOSA衛冕冠軍

香港男子手球甲一聯賽今日喺石硤尾公園體育館上演咗一場精采嘅強強對決，下半場經過一番緊張嘅拉鋸之後，由南華以13:10獲得今屆冠軍。

男子甲一組EVOSA、南華繼上年手總盃四強後，相隔九個月喺今屆手球聯賽再度碰頭。經過十一輪賽事後，南華及EVOSA分別以常勝姿態喺聯賽積分榜並列榜首，所以哩場「打吡」真係令人期待已久，早前預定九月一日開戰，因颱風延至今日舉行，好彩各球員狀態都保持得幾好，士氣高昂！

EVOSA喺今屆聯賽陣容變化不大，引入門將蘇淳恩，配合原本已經相當強橫嘅防線，令EVOSA喺上半場以防守反擊力抗南華嘅凌厲攻勢。南華喺今屆聯賽就有唔少陣容調整，於梯隊SCAA提拔了李少聰、連潤滔、羅俊耀幾位進攻好手，進一步提高進攻火力，門將方面繼續由葉冠英主守，打快攻及防反都非常有效率。

南華一度領先至8:4，隨即EVOSA喺短時間內連追四分至平手，兩隊進入拉鋸戰，最後南華以快攻及防反戰術終於再度拉開差距並獲勝。

今次甲一聯賽係2019年後事隔三年再度舉行，亦係南華繼上屆後再度奪冠，意義重大。嚟緊會繼續有手總盃嘅手球賽事，有興趣睇手球比賽嘅各位可以留意手球總會公布嘅賽程！

賽事精華：

Text：Nicole
Photo：Alan Li