斜槓道－Nick

「努力讀書＋找份好工＋結婚＋生兒育女＋買樓供樓⋯⋯＝美好人生 」大多數人都理所當然地按着這條公式走，但隨着世代價值觀念的轉變，這或許不再是贏得美好人生的唯一公式。現今的年青人不再埋首在單一正職工作，寧願當幾份兼職增加收入，以擁有更多彈性時間提升自己多面向的生活品質，他們就是「斜槓族（Slasher）」。正值而立之年的業餘跑手Nick，自加入斜槓族後可謂72行都有涉獵，當兼職撰稿員、調酒師、做外賣「步兵」，又有做過與運動推廣相關的工作：經營運動網上平台、舉辦比賽，希望藉自己人生宣揚一種理念——人生不只是上班，是有更多可能性。他對年紀不以為然，更積極地說：「自己開唔開心應該係自己諗，人哋點樣睇係唔緊要嘅，自己覺得嗰樣嘢值得做嘅咪得囉！」

或許在這個世代物質享受不比生活享受重要，正如俗語所講：寧吃開眉粥，不吃愁眉飯。

  講跑。港跑版主Kong.run
CIBS 香港電台社區參與廣播服務 –
《運動無限SLASHER人生》 節目主持： slasher.athlete

個人最佳成績節錄（PB）
10公里：35:57
半 馬：1:18:59
全 馬：2:41:34
World Major Marathons 6-star Finisher

越野跑
2018 Ultra-Trail du Mont-Blanc「環勃朗峰超級越野耐力賽」(UTMB)：33:53:45
2017 The North Face 100(TNF100）：15:02

獎項
2020 TNF100 Thailand 25km 男子 — 全場總冠軍
2017 香港街馬半馬拉松男子（壯年組 ） — 季軍
2017 扶輪香港超級馬拉松男子 — 全場總亞軍
2016 UTMT 環大帽山越野賽 YTF 50km 男子成年組 — 季軍

遲來的天賦

「跑步相比其他運動好似簡單容易啲，自己一個人搞得掂，而且滿足感大啲。」兒時是個胖子的Nick，籃球、足球等球類運動不是自己擅長的項目，他笑言：「手腳真係好唔協調，做後備都嘥氣啦！」直到大學期間，嘗試以跑步作為興趣，由健身室內的跑步機作為起點，無意間發現自己有天份，遂嘗試挑戰自己，參加他認為人生一必做的事——渣打馬拉松。

人生的第一次，往往是不能忘懷的，Nick記憶猶新：「呢次係好痛苦嘅經歷，未試過跑咁長。好記得去到30公里之後就體驗到嘅『撞牆』，又餓、全身抽筋，仲要向身邊嘅跑手乞求嘢食，蕉又冇能量棒又冇，好彩有位跑手問我係咪好肚餓之後就俾咗包朱古力我啦⋯⋯」

談起這次尷尬的場面，他不禁大笑起來，賽事雖以4小時20分鐘成績完成，但他未有氣餒，反而發掘到自己跑步的潛能，於是全速前進，集中火力專注訓練，「跑步係好直接嘅運動，你擺幾多時間心機落去，個結果就會愈多」，透過加入跑會、街跑、山跑、健身室提高自己身心靈的實力。

屢跑旅跑

十多年前的渣馬是Nick的起跑點，10公里、半馬抑或全馬賽事，他都一一征服，就連海外馬拉松也「跑」覽無遺。喜愛遊歷世界的他，發展出一條特別的旅行公式——跑步旅行。跑過西班牙、德國、美國、日本等地的馬拉松，令他享受與一般旅客有別的福利，「用馬拉松嘅方式，因為路線，你會好深入去睇嗰個城市；用腳去認識一個城市，你會體驗到當地人嘅跑步文化，以致人文文化」。

縱橫過多次海外馬，Nick指香港比起世界各地亦有其特別的跑步文化。他觀察到，德國人賽後會喝啤酒、日本人每跑一段路會熱情送上一句「奸爸爹」及壽司菓子，至於香港的跑賽總是充滿着「嘉年華味」，「除咗打卡呢個特色，就算唔跑全馬都會跑10K當參與過嗰場盛事」。他又續說，香港賽道亦頗特別，跑賽是在清晨時段進行，而且多橋多斜，總帶給跑手重重挑戰。

世界之大，無奇不有，Nick以「跑步旅行」為自己寫下人生的可能性。雖然他不是精英跑手，但就是簡單地以跑步與自己對話，感受世界脈搏的跳動，就足以帶來人生的重重突破。

Nick曾參加2017 TNF 100 (photo by Foto Mo)

直線與斜線

年紀漸長是運動人普遍遇上的關口，因傷而退同樣無可避免的。Nick愛嘗試挑戰，殊不知因一次Kick Boxing意外傷及腳筋，康復後就以2019年的東京馬拉松作為「暫時」的告別式，「可能年紀關係見到自己能力限制就冇再特別去Train，受傷之後都無再跟跑會，呢一次（東京馬拉松）係最後一場認真練習以及備戰⋯⋯」他了解自己，亦不會強迫自己，反思或許是時候要走另外的路⋯⋯

兩年間的疫情殺我們一個措手不及，Nick就伺機找些「細藝」來打發時間。時代艱難，為了在有限時間做到自己想做的事，他勇敢辭去正職成為Slasher，為探討人生的可能，在社交平台「Clubhouse」以運動會友，充當頻道主持來，「疫情大家都好無聊啦，就搵咗好多做開唔同運動嘅朋友吹吓水，講吓佢哋自己嘅故仔」。鑑於Clubhouse小試牛刀的成果，令Nick與單車冒險家好友阿翔萌生做媒體的念頭，二人遂申請了香港電台社區參與廣播服務計劃（CIBS），透過運動員鮮為人知的故事勉勵大家，「節目唔係訪問咁簡單！概念係來自運動員係點樣搵食，點樣面對經濟壓力等，想用比較貼地一面嘅概念去做一個運動人嘅故仔」。

結果，他們的申請獲批，節目以《運動無限Slasher人生》為名，並請來十三位不同項目的運動員，分享其心路歷程；或許他們未必是廣為人知的，但他們實現理想的熱情，是打動人心的契機。

我想故我做

人家常說，傳媒是一個「捱麵包」的行業。Nick是一個率性的人，不甘於行屍走肉的過活，只為着一種普通信念：「純粹係鍾意㗎咋！」

運動員的故事是老掉牙的題目，當各大傳媒聚焦在成績、訓練過程，更甚是花邊新聞的時候，就往往忽略了他們背後的辛酸，而這些都是大眾值得借鑑關注的故事，不是普普通通的新聞資訊，「香港嘅運動員面對嘅係一個結構性問題，類似雞先定蛋先嘅問題⋯⋯佢哋嘅故仔唔單止令大家認識多啲個運動，更係希望令人知背後個理念，從中學習了解，成件事係貼地啲」。

營運Clubhouse、CIBS節目解鎖了他當媒體工作者的技能，面對自己跑步的力有不逮，他從容不迫，過去的跑步生涯令他更堅定當Slasher的決心：「關於年紀，我成日都問自己，甚至喺節目俾人問返轉頭，咁嘅年紀供唔到樓買唔到樓，我喺度做緊啲咩呢？我諗時代變咗，大家追求嘅嘢都唔同，要去試唔同嘅嘢，做自已想做嘅嘢，先會發現到自已嘅可能。」

選擇跳出正職的舒適圈絕非易事，惟Nick希望在這混亂的世代，仍能安身立命，而非活在一個規範公式化的人生裏。作為一個遲了加入的Slasher，他絕不慚愧，反視為一種解脫，「呢一刻自己做好自己，去做啲鍾意做嘅嘢。人生係有好多嘅可能性，運動或者slasher都只係一種方式，唔係一定結婚生仔買樓供樓先係唯一正確嘅路，就好似我搞CIBS呢個節目咁，做鍾意嘅嘢係一件開心嘅事嚟⋯⋯」

人往往忽略那微不足道的事情，跑步可能是沉悶的運動，但至少對Nick而言是一人之境的練習，是啟發人生的必修課，彌足珍貴。

原文刊於《運動版圖》2022年5月號