笑看世代更迭 - B-boy Four

//當B-Boy不再是Boy，面對的是什麼？//

追夢和堅持夢想，對B-Boy Four (阿四)來說不無掙扎：「我剛開始接觸Breaking只係覺得好有型，直到20歲左右才開始更專注地跳，但始終都要有份全職工作維生。我唯一堅持係返朝九晚六，星期六日盡量不開工，公餘便有多點時間練舞，周末有時去比賽。」

阿四現年33歲，他仍在堅持跳舞。即使有不少後來居上的B-Boy，參加港隊選拔時他仍然自信滿滿：「我可以嘅！練多啲體能就得！」

當夢想散落四方

阿四曾以為夢想就只能是夢想，要在生活與生存之間平衡，夢寐以求的舞台卻突然在眼前展現：「港隊喎，可以去巴黎比賽喎！機會難得，我要去，就算被老闆炒都要去！」

得知香港即將組Breaking港隊，他亦較有空閒，打算改進自己的技術，港隊選拔便成為一個絕佳的奮鬥目標：「以前都知道要點樣操練，但無奈我哋和外國 B-Boy不同，佢哋有些可以全職跳舞，我哋要返工，有時放工都好攰，便會疏懶⋯⋯Breaking入咗奧運項目，香港有Breaking港隊，令我多咗個目標，更加有動力去操練。」他做多了拉筋訓練和體能，「以前細個不會拉筋，現在要做到瑜伽嗰種！另外我都會做核心訓練、掌上壓，又會跳繩練氣。」這些努力沒有白費，原來港隊選拔賽海選之後還要進行循環賽，參賽者至少要上場14至15回，甚至20回合，跳一整天甚為疲累。

2021年12月香港首次派代表參加法國巴黎WDSF世界霹靂舞錦標賽，那時他剛返新工不久，往巴黎比賽數天，回港卻要隔離21日才能上班，他估計可能老闆不會接受，沒想到老闆卻很支持，批准他放無薪假一個月，「我還以為要重新搵工了，真係好彩！」香港人返工大過天，但面對夢想，阿四義無反顧。

「我14、15歲開始喺社區中心玩Breaking，嗰時隊Crew叫Relax，隊員雖然現在已很少一起跳舞，但都各自喺自己領域去推廣街舞，有啲人可能轉玩Popping，有人則玩hiphop⋯⋯音樂人JB亦是隊友！我覺得就算無繼續跳Breaking，都可以喺文化維度去推廣。」Breaking成為2024年巴黎奧運項目，阿四認為是推廣Breaking文化的機會，「如果能幫到B-Boy維生係好事，但我最希望嘅係維繫到呢個文化，Breaking有其獨特嘅文化，不止是運動。」

文化傳承凝聚力

他強調Breaking是一種「文化」，可能是他加入現時的隊伍Crossover後的領悟，「我19歲時已跳了幾年Breaking，希望自己有進步，便想離開自己成長嘅社區去出面跳下，朋友就介紹我加入Crossover，那時隊員們年紀都比我大，跳舞之外，我從佢哋身上更學到好多為人處世嘅態度，也因為跟佢哋到處比賽，我見識更多更廣。」有次他們到大陸比賽，他獲得其中一個大型賽事「演舞會」的「最後舞士」頭銜——香港獲得此獎項的人至今只有三、四位，「最令我開心不止因為證明了自己嘅實力，而係有機會與大會邀請嘅外國強勁對手Battle！始終 Breaking起源是美國，佢哋嘅文化好勁！」 2017年他便因此有機會與頂尖的B-Boy Phil Wizard對戰，Phil是今次巴黎世錦賽的第二名。

這次巴黎世錦賽的冠軍B-Boy Victor才22歲，他6歲便開始玩Breaking，「他爸爸以前亦是B-Boy⋯⋯外國很多B-Boy已是第二個Generation！我相信有上一代支持會更有進步空間，像我哋細個自己摸索，難免行好多冤枉路。」所以他寄望Breaking列入奧運項目後，除了有更多資源投入推廣，亦會有更多家長認識Breaking、願意讓小朋友接觸，培養到Breaking文化氛圍，才能有更大發展空間。「細個時便覺得Breaking是運動，曾想過如果Breaking入到奧運應該好巴閉！」那時他只覺得好型，現在就覺得這是藝術，需要時間浸淫，「除了跳舞本身，也是要表達自己，有點歷練後我都慢慢體會當中嘅哲理，所以我覺得跳舞要有Mind，跳法、流程都應該經過思考。和外國選手Battle，我覺得香港B-Boy都知道要怎樣跳，面對國際賽事嘅心態，我諗我哋都準備好，只是體能要再跟上去。」

阿四在自己成長的社區玩Breaking，除了看前軰跳舞，便是借朋友的DVD觀看外國賽事或表演，踏上國際舞台對那時的他來說是超級遙遠的事： 「我雖然不是跳舞天才，但都想在香港成名；後來到外地比賽，見識到外國跳舞勁嘅人好多，亦慢慢看得懂佢哋有幾勁。我細個時無得睇Youtube，但現在資訊發達，近年開始玩嘅B-Boy可以較容易搵到好多參考影片，很早便能擴闊眼光，我相信佢哋進步嘅機會也更大！」

阿四繼續堅持追夢，也許只是想讓後來者有可以繼續前行的路。

(完整封面故事收錄於《Sportsoho運動版圖》2022年3月號)

Text: Nicole
Photo: He-man、Conrad
Design：Alice
Graffiti: Uncle@AWS