成長的彼岸 – Tina、Joann、Yan、阿德、Chris
時光匆匆，歲月匆匆，人生匆匆；對於五位社會新鮮人來說，再次經歷熱血瘋狂的事的確有點招架不住；這三個多月來的經歷，一幕幕的難忘回憶，他們漸漸體會如何為自己的人生負責，比起肉體上的精神疲勞，體驗和得着才是真正令他們「招架不住」。
脫離舒適圈，踏入社會的確磨滅了自己許多的意志，即便如此，他們仍然盡力堅守自己的原則，做個不被世俗渲染的人。
（左起）
宋佩恩（Yan）：現職傳媒界
姚芷婷（Tina）：現職教育界
何承德（阿德）：現職金融界
張嘉賢（Chris）：現職會計界
吳祖恩（Joann）：現職教育界
心中尚未崩壞的一部份
為了能夠參加「跑21」，他們特意尋找能夠配合課表訓練的工作，雖然精神是極其疲憊，課表出乎意料的「Chur」(緊密)，但為了圓夢，那麼辛苦也是在所難免的。Tina 說：「因為上年final year 同埋做intern 啲時間撞哂，所以無得玩；既然今年有得玩，就特登搵份返朝八晚五嘅工！」本是「山人」的Joann 與Tina 一樣，為了能做想做的事，亦特意應徵較輕鬆的工作，「本身對路跑興趣唔大，返工都真係好攰，會唔想做運動連山都跑少咗，但見到哩個活動係一班人跑，我又想試下喎」。
「如果返下晝3點嘅咪朝早嚟一個長課先囉，又或者收夜晚11點咪12點約人一齊跑囉，都係Google Form 㩒個制交更啫，時間可以自己就嘅。」有跑團經驗的Yan 是一名記者，需要輪班工作，事前她更不知道課表，有可能會在第一階段被淘汰，既然面對更多的未知，她選擇以平常心去面對接下來的訓練和遴選，Yan 說：「其實事前有兩個跑團都落選咗，所以都叫做睇開咗嘅，做自己就得呀。」
阿德和Chris的工作較他們繁忙，要做到「Work Life Balance」去參加「跑21」是很大的挑戰。二十四歲的阿德是團隊中最年長的一位，進入職場已有一段時間，現於銀行裏工作，「銀行好忙好忙，慶幸work life balance 到嘅，不過都真係幾攰，但跑步係一個釋放壓力嘅渠道，就盲樁樁試下跑一百二十三公里」。Chris 踏入職場已有半年，工作量非常繁重，更數次因加班需要遲到或缺席長課訓練，最後也能撐過去，「其實份工都係好忙好忙，讀緊U 嘅時候剩係得讀書，都無試過啲咩，我唔想之後會後悔呀，好彩最後都叫做工作興趣兼顧到」。
懂得自己才是最大得着
作為團隊中年長的一群，事前決定去做一件事會有較多的想法和顧慮。也許自知工作會影響表現，五人早就抱着「處之泰然」的心態參與當中。Tina 深知自己的能力是遜於別人，跑過最長的只有十公里，故她無時無刻存有被淘汰的心理準備，「其實都幾大壓力呀，一開始要報自己嘅距離，大家都比我多幾倍，所以我個期望會係享受同埋盡力去做」。到了起跑當日，Tina 是最早離隊的學員，直到現在她仍耿耿於懷；後來自己體會是學會接受自己會有倒下的時候，「上車之前有好多掙扎，覺得好似嘥咗傑哥嘅努力，因為傑sir 問咗 一句『係咪心痛？』我就淚崩啦。慢慢靜落嚟，又好似明白一樣嘢，要知道自己係有軟弱嘅一面，唔好逞強，要欣然接受」。
對於隊友中途離場，Yan 的心情複雜，至今仍未停止回想，她分享說：「眼見幾位唔能夠一齊完成係好心痛，但更多係會反省自己嘅表現，點解自己唔再做好啲？自己有冇盡全力做好呢？對於上咗車嘅人，又會諗到要尊重人嘅決定呀，因為要將自己嘅弱點表露於人前係好難嘅事。」Joann 則補充指，有需要「上車」其實是無問題的，照顧好自己才能走更遠的路，活動當日她亦身體力行，大部份時間都維持體力，留力到最後用繩索去幫助隊友。
「哩條繩係一個象徵，係將大家連成一線，同時測試自己做一件事夠唔夠堅持。」阿德說。他指自己跑步前做人沒甚麼目標，自疫情接觸跑步後，漸漸感受到這項運動怎樣為他的人生定下目標，「就好似『跑21』咁，會發現好鍾意挑戰自已，參加啲極限嘢；至於繩索的意義，我會覺得係要學識付出，同埋分享」。至於Chris 與阿德的想法一致，更認為「繩索」的意義，在於用來鞭策和提醒他那年做過瘋狂的事，「人有時會有啲推動力，一班人就係哩種推動力，你先可以行得更遠」。
掌握，不管那有多困難重重
面對未知，面對恐懼，我們無疑會有所卻步，對於他們幾位已經踏入社會的學員，「跑21」的角色很特別，這次的經歷叫他們勇敢地走下人生的道路，當中的得着讓他們好好牢記那個最真實的自己是什麼的模樣。
Tina 說：「活動過後我多了感恩。除了隊友無私的奉獻，還有support team、helper 們和攝影師們，多咗留意身邊嘅人點樣付出。」雖然自己未能完成挑戰，Tina 會視之為一個進步的動力，就算日後會否繼續跑步，都要記得她如何努力過，「我自知自己能力弱，但我都會選擇參加。有時看待一件難嘅事唔應該去否定自己，你唔試係唔會知道自己嘅底線同埋能力，哩啲火花係要刷出嚟嘅」。
Joann 想起途中未有幫助照顧好Tina，眼見她最後離場，才想起自己有否真正幫助別人。途中的山路，她曾提出給Tina 外套，但因婉拒後便作罷了，「 幫人係可以主動啲，唔單止係問，係要行動，要踏出comfort zone；有時人可能怕尷尬而話唔需要幫忙，就好似Sunnie 嗰下直接除褸畀佢着，哩件事我都諗咗一陣」。
Yan 的工作早已磨平了她的棱角，除了要時刻謙虛，更要做好自己本份，她說：「記得傑sir 提過跑步嘅都係好人，我好希望自己繼續做一個好人，加埋練出嚟嘅毅力喺我哩一行度發光發亮！」
阿德和Chris 的想法很類近，「跑21」呼應他們的職場生涯和做人意義。阿德分享：「『跑21』係一個開始，除咗我會挑戰更多跑步比賽，例如HK100、UTMB 越野賽之外，更多嘅會係人生目標；會諗更多我嚟緊嘅工作目標，同埋發展方向，對人生多啲承擔。」
Chris笑問：「好似玩咗『跑21』之後自己反思自己適唔適合做宜家份工咁？」一直以來以保守的態度去走他的路，這次的經驗激發了他，把他的「怯」慢慢放下，令他放膽試不同的路向，或許會製造出不同的可能。就正如跑步界的至理名言：「沒有奇蹟，只有累積。」
Text: Dorz
Photo: Conrad, Gary, Lucien, Alan, Jack
Design: Alice Fung
原文刊於《運動版圖》2023年2月號
