潘俊傑（傑sir），香港青年協會單位主任（青年服務）、註冊社工
守望者 –「跑21」活動統籌 潘俊傑（傑sir）
「只要你相信，壞嘅人總會變好。」一直從事青年事務工作的社工傑sir ，同時又是田徑和長跑教練。跑步是他從小到大喜歡的運動，故他一直希望將興趣和工作結合，而「跑21」正是他一直期許的目標。透過活動，傑sir 最重要想傳遞的訊息是：只要有機會，年青人就能呈現最美好的一面。
醉心工作
儘管有多艱難，傑sir 盡量想辦法做好青年事工。「跑21」的靈感來自2021年疫情期間，在社區活動停擺下，傑sir 不斷構思如何在有限的條件下，能舉辦活動，「疫情下年青人冇理由唔需要做運動㗎？但當時嘅條件真係好難搞到活動」。殊不知，他發現了著名越野跑手黃浩聰（聰sir）的「香港360」項目，利用四日時間跑出三百六十公里，「見到聰sir 都咁做，我又覺得年青人都可以做類似嘅嘢㗎喎，於是就搞咗第一次嘅『跑21』啦」。
「跑21」即在二十一小時內，跑經全港二十一所青年空間，活動旨在令年青人認識青年空間之餘，更認識自己；而今年最大的不同是加入了「拖繩」的元素，讓參加者認識團體精神的概念，傑sir說：「所以今次嘅訓練，由開始就要畀佢哋知道點樣互相carry大家，點樣由起點跑到終點。」
人最美麗的光芒
傑sir 認為，有了「拖繩」的元素，令今次「跑21」比上次更精采，亦展現了年青人最真實的性格。傑哥因用繩拖了隊友一大段路，最後因體力透支舉手「上車」，令團隊上下目瞪口呆，傑sir 亦有深刻的體會：「『犧牲小我，完成大我』哩八隻字大家都識，但去到一啲關頭真係唔易做到，哩班年青人就證明咗畀大家睇係做得到。」除了傑哥的捨己為人，成全隊友完成挑戰外，傑sir 亦深受他們的真誠打動，更加喜歡做青年工作，「可能真係有繩嘅關係，大家會諗多咗大家，佢哋雖然唔講，但當中佢哋因為唔係一班人一齊完成會覺得好對唔住我，你就會諗佢哋好想用結果去答謝團隊嘅上上下下，哩個舉動覺得佢哋好可愛」。
這次的一點一滴，令傑sir 見識了年青人，甚至人性最美的一面，更加相信自己當初做社工的抱負和期望。
為我保留心的寄託
傑sir 笑說：「劇係咁拍㗎嘛，去到第三集已經唔好睇㗎啦，有social impact 就好足夠啦。」辦了兩次成功的「跑21」傑sir 已經是無憾了，他亦因此有所得着，除了達成將跑步結合青年發展的願望外，他相信只要相信自己便會感染他人，「無嘢係無可能嘅，當你去做哩件事，好多人明裏暗裏支持住你，back up 住你，原來係認同緊你，成件事個畫面好美、好靚」。
有了「跑21」的經驗，傑sir 會繼續努力服務年青人，成為他們的成長導師；與此同時，他亦努力告訴大家年青人的更多可能性，證明年青人絕非不濟，只是欠缺重視，欠缺機會。
結語—有多少苦痛有你和我一起度過，一起承受；有多少快樂有你和我一起享受，一起感動
二十一小時，一百二十三公里；三個月，三十多天，這一年這十三位學員一同經歷蛻變，就這樣締造了一份珍貴的友誼。還記得訪問當天，問到走過這三個月後會變成怎樣，其中一位學員的說話叫人難忘：「好唔捨得，但都要繼續向前走，無論大家喺唔喺大家身邊都好，嗰種經歷回憶係會一世跟住你，證明大家都互相陪住一齊成長。」
我想，這就是《當我們一起走過》的意思，就是青峰簡單淺白的意思——無論何時何地總會有人在你身邊，大概與「跑21」的理念相映成趣。
您又會否認為，一班人跑比一個人跑更好嗎？
Text: Dorz
Photo: Conrad, Gary, Lucien, Alan, Jack
Design: Alice Fung
原文刊於《運動版圖》2023年2月號
