承載夢想重量 - B-Girl Lady Banan

//香港好少B-Girls，希望香港代表呢個身份會令多啲女仔嚟玩Breaking。//

阿四和Think對推廣Breaking文化滿有使命感，兩位B-Gilrs則似乎更多了女性視角的思考：為何玩Breaking的女仔比較少？為何仍堅持到現在的女生愈來愈少？Lady Banan(阿蕉)一句道出現實：「有啲動作要好有力量，例如倒立，我嘅手就唔夠力Freeze，一啲Power Move我都未必做到。」她手腕試過受傷，但休養後繼續跟Crew去比賽：「我隊Crew得我一個女仔，佢哋係令我堅持玩到而家嘅重要原因！」她雙手未必承載到自己的體重，卻承載了隊友的夢想。

回到啟蒙時

阿蕉接觸Breaking的經歷和大多數人相似：校內暑期班、校外興趣班⋯⋯「那時協青社派導師到學校教跳舞，我學了一個暑假，之後自己再到協青社報班。」協青社轄下的「嘻哈學校」一直在青少年間推廣街舞文化，更透過「蒲吧」這個青年文化基地舉辦不少街舞相關活動及比賽，是不少人接觸Breaking的起點。「我一直都喺協青跳舞，我加入嘅Crew隊友都喺協青教跳舞，對呢度好有感情，可能因為咁，我好自然咁都做咗跳舞導師！同埋喺協青舉辦Breaking活動時都會幫手。」有如一種微妙的承傳，阿蕉可能也會成為某些新生代B-Boys、B-Girls的啟蒙者；她青少年時期從Breaking獲得的幫助，也有機會回饋Breaking。而她由興趣以至工作，都和Breaking密不可分。

「協青社一直都好支持街舞文化，所以我喺呢度工作，除咗可以多啲空間跳舞，有時要出外比賽，需要請長假，都會獲得批準，如果我打其他工應該無咁有彈性了。」她們隊Crew一直以來都會到各地比賽，希望讓其他地方的人認識香港的break dancer，更希望把握機會和各地高手交流，令自己更進步。「有時去比較遠嘅歐洲或美國，我哋會去多幾個唔同城巿參加當地比賽，加埋逗留一個月左右。如果是其他全職工作，就無可能經常去外地比賽了。」

由香港放眼世界

堅持跳Breaking，對女生來說挫折尤多，阿蕉坦然若非因為隊友鼓勵，她可能早已放棄，「好多B-Girls都唔再跳舞，可能因為好多高難度動作都做唔到⋯⋯初時同我一齊跳嘅有10個女仔，到最後得返我一個，差啲都想放棄⋯⋯當時嘅導師創立了Boogie Renaissance Crew，邀請我入隊，先鼓勵我繼續跳到而家！」她跟Crew去各地比賽，見識了香港和日本、韓國和台灣的實力差距，早已體會到挫敗的滋味：「我本來目標係入到32強，但最後排名52，表現未去到最好，不滿意！」阿蕉在港隊選拔賽第三站時腳腕扭傷，去巴黎時負傷出戰，因此她笑言排名比想像中好：「喺香港跳到名列前矛，但去到國際賽事只拿到中間名次，完全感受到實力差距，所以我哋更加要努力去追！」

「日本和韓國嘅Dancers都因為比賽見得多而識得，有啲都成為朋友，今次我哋去巴黎參加世錦賽都有遇到佢哋，有少少交流。見到其他隊有隊醫、物理治療師隨團，都好羨慕！」以往她們去日本比賽，有時會住B-Girl朋友家，最深刻的印象是她們的練習決心：「可能凌晨2點佢會駕車去附近Studio練兩個鐘，只瞓2至3小時，第二朝7、8點要返學⋯⋯佢哋好似唔care自己瞓覺時間，將啲時間攞嚟練習，因為佢哋仲讀緊書，要兼顧學業。當大家都話佢哋好勁時，可能無留意背後佢哋都付出咗相應嘅努力。」雖然阿蕉都曾想像過這樣的全職生活，「我覺得應該幾爽，但喺香港氛圍未夠，我哋要再努力啲！」

寄望奧運新氣象

經常觀照外國友人的跳舞生活，令阿蕉對在香港做B-Girl亦很有想法：「我曾經都掙扎過做美容還是繼續跳舞，做美容收入會多啲，但我都想為夢想努力咗先。」為了平衡生活與生存，她除了在協青社做兼職，亦同朋友夾份開舖，公餘時間才去為人修眉，發展其他維生技能。「有個朋友入咗Redbull BC One，係全職跳舞，但就要經常去參加大賽，攞到第1、2名會有大筆獎金幫助維生——如果唔係咁好難做到全職Dancer！香港好難做到。」

香港難就難在社會氛圍對Breaking的接受程度，阿蕉認為Breaking成為2024奧運項目，對Breaking發展是個轉捩點：「以前啲人會覺得跳Breaking嘅人好壞，但自從入咗奧運項目，都多咗家長來協青社幫小朋友報班。而我就希望代表香港嘅B-Girl去比賽，可以令多啲女仔嚟玩Breaking！」

(完整封面故事收錄於《Sportsoho運動版圖》2022年3月號)

Text: Nicole
Photo: He-man、Conrad
Design：Alice
Graffiti: Uncle@AWS