唔用粗口寫作系列──《謠言》｜劍擊
「蔡俊彥，個人打得好，團體就會特登打差啲。」
我正式聽到上述謠言係喺港隊已出線東京奧運之後。當時為2020年二月，亦係爭取奧運資格嘅最後一站。謠言應該係哩個時間點開始散播。
等我嘗試用最精簡嘅方法解釋一下劍擊隊點樣出線奧運。首先團體世界排名前四就會直接出線，得到團體資格嘅國家或地區亦會得到三席個人賽資格；撇除世界前四隊伍後，每個洲排名第一都可以出線(例如日本世界排名第一，中國世界排名第五，日本就會以世界排名前四出線，而中國就以亞洲第一出線)。其後就係每個洲個人世界排名最高兩位出線，但每個國家或地區只有一個名額(即係就算香港有兩名運動員世界排名分別為亞洲一二都只會有一名運動員可以出線)，已透過團體資格出線的地區便不會再獲得額外個人賽資格。最後就係每個洲嘅資格賽，勝出者出線。
香港隊出線情況尚算樂觀。當時我哋奧運積分排名第四，韓國排名第五。若果當時團體未能出線，香港隊很大機率只有我可以出線，因為我個人排名係香港同亞洲都暫時係最高。
聽到謠言當時我心入面覺得好無助同憤怒。我開始陷入無盡嘅思想掙扎，好想知係咩人要咁話我——係體院職員、其他國家嘅人、劍擊總會嘅人定其實係我嘅隊友⋯⋯？
其次，每一個奧運團隊出線賽我都竭盡所能，好幾次關鍵場次都挺身而出，為團隊增取咗唔少嘅分數⋯⋯到頭來俾人話我唔盡力，令我覺得更加無辜。
亦因此我曾經喺訪問提及過打中學學界獲得團體冠軍比出線奧運更加開心，嗰份快樂係更加純粹。
的確有關謠言大大影響我出線後嘅心情，但我認為自己最失敗就係曾經俾流言蜚語徹底影響心情。
每一個人都無可避免地經歷過被誣捏、被誤解。現在的我明白到，唔好覺得自己處處被針對，因為你愈成功，愈俾多人關注，謠言自然會愈多，聽到嘅說話都可能愈難聽。俾人談論，換個角度睇或者都係一種成功指標。
妒忌係人類一種好正常嘅情緒，與其咁介懷人地點諗，不如多謝吓真心會為你成功而高興嘅朋友家人！
謠言止於智者，嗰個智者應該就係你自己啦！
最緊要都係要問心無愧做好自己，保持信念。
最後，我其實大概知係邊個散播哩啲謠言。
想喺到講一句多謝你哋幫助我成長，祝你哋身體健康，長命百歲，出入平安。
我係唔會再俾你哋影響我㗎啦 :)
原文刊於《運動版圖》2024年5月號
