我們都是打不倒的香港人！ [史丹利店長]

三月初，運動康樂設施陸續重開，跑友都急不及待衝進運動場，大家相見時，都有種劫後重逢的感覺！
肥強：「呢個武漢肺炎，真係諗唔到咁厲害，全世界嘅馬拉松比賽都要停擺！」
阿靚：「本諗住東京馬拉松PB嘛，發夢都諗唔到會取消，練得咁辛苦，真係好唔抵，喊濕咗幾個枕頭呀！」
肥强 ：「我仲大鑊啦，巴黎馬拉松啱啱宣佈延期到十月，計劃咗成大半年，本來打算喺呢個比賽向我女朋友求婚，連戒指都買埋，依家都唔知點算好 ……！」
馬王：「突然間停晒啲比賽，依家跑步好似無晒啲方向同目標咁樣！仲有東京奧運都可能要改期，真係世事如棋鑊鑊金！」
眾人滔滔不絕的互吐苦水！
老鬼華呷了口能量飲品，徐徐的說：「朋友，呢個時勢，呻係無用㗎，無比賽咪跑少啲哩數，分配啲時間操多啲肌力體能，打實啲個底囉，依家唔止鬥實力，仲要鬥埋AQ（逆境抗壓能力），經歷過舊年社運到依家，大家話晒都見過大場面，抗逆能力都應該升咗「呢」，都係嗰句煮到嚟就食，見招拆招啦 ! 」
肥強：「同埋呢一輪嘅比賽取消潮，不論香港同埋海外賽事，對於主辦單位點樣去處理善後安排，係一個大考驗，優勝劣敗立見高低！」
老鬼華 ： 「風平浪靜見唔到真功夫，風高浪急至迫得出潛能，我哋係香港人嚟嘛，愈戰愈強係我哋嘅特質，大家唔好講咁多，跑完之後操多兩組深蹲，練扎實啲四頭肌，做好準備，迎戰重開嘅賽季啦！」

大叔寄語：
打唔殘，應變快，有難同行，係我哋香港人嘅特質，大家一齊守望相助，互相抱緊走出逆境吧，香港人加油！