躍動道－Ropssy

只要相信，夢定能飛！

誰又會想過滑板、霹靂舞這些「Underground（次文化）」的運動終能走進奧運大舞台，成為主流的運動呢？這全靠一班堅持的人努力，一直深耕細作，才能把沒可能的事變得有可能⋯⋯對比起滑板、霹靂舞，交互繩（Double Dutch）雖是「Underground」，但比起前兩者更為偏門，很多人亦對它不明所以；而作為香港double dutch圈中碩果僅存的「Ropssy」，靠着大型比賽、表演「省靚招牌」讓更多人認識它。

雖說把Double Dutch送上主流之路遙遙無期，但靠着「喜歡」、「執着」的宗旨，「Ropssy」甘願做舵手，把double dutch成為主流不可能的事，變得有可能，就好似這個運動的特式–多元化和無限！

甚麼是Double Dutch？

交互繩（Double Dutch）最早起源於荷蘭，故又稱為「荷蘭雙繩跳」後來流傳至美國，是眾多花式跳繩比賽當中，最具有娛樂性與觀賞性的一項運動。當中有體操、力量、舞蹈、步法等元素，再配以強勁節拍的音樂，比起傳統跳大繩更有刺激性和別具一格。交互繩主要技術來自街舞風格，將「繩」和「舞」完美地融合。

玩法由兩名搖繩者分別握住兩根繩子的末端，兩根繩子向相同或相反方向依次揮向地面，同時跳繩者在繩子做出各種技巧，跳繩者和搖繩者可以相互轉換，跳繩者在繩內便會做出一些高難度或特別動作等。

引繩躍動

Tai Tsz和Ted Ma縱橫跳繩界有十年，一直以來二人代表香港南征北討獲得很多殊榮；惟疫情來到使教班工作叫停，在工作停擺期間他們為了打發時間，遂發現double dutch的可能性，便嘗試引入跳舞、tricking（極限特技）、拍攝等元素，為跳繩市場帶來新的衝擊，*「Ropssy」就因此成形。雖然「Ropssy」成團只有兩、三年，加上香港人對double dutch亦未有認識，但他們絕對相信它發展的可能性，非重競技性的特點比起傳統跳繩更有個人風格和觀賞性強，「哩一樣嘢係跳繩嘅新市場，當中有好多發展嘅可能性，相信哩種咁個人風格嘅嘢，可以吸引好多人認識哩種運動」。

*團名「Ropssy」的靈感來自美國潮流品牌「Stüssy」，意思即地下文化亦有其別具一格之處，就有如Double Dutch 特色一樣，把所有「underground」集於一身，跳出自己或團隊的獨有風格。

無限延伸的繩子

Tai Tsz分享說：「我都無意間跳咗十一、二年繩，又係第一批香港跳double dutch嘅小朋友，當接觸咗之後，就慢慢唔鍾意傳統跳繩。」本身是田徑圈的中堅分子Tai Tsz，因肌肉撕裂無奈轉向跳繩，從小就喜歡挑戰和突破的他，就同時接觸double dutch，去到大學期間更加入舞蹈學會，同時鑽研跳繩和跳舞。2018年，Tai Tsz在國際交互繩巡迴賽韓國站的「1on1 battle」奪冠，隨即便萌生要發展double dutch的念頭，「拎到第一個得到嘅國際獎項，就會諗係咪要為香港做返啲嘢呢？係咪要喺香港撐起哩個界別呢？」，於是他便積極辦興趣班、開放式訓練等，讓大家對這個運動有一定認識，尋找更多有意之士撐起香港的double dutch 圈。

一直在傳統跳繩圈發展的Ted Ma，double dutch不是他的強項，因被友人受邀組隊參賽後，在陰差陽錯下便進入了double dutch圈，很快便愛上了這個運動。他說：「本身都有留意double dutch，後尾就去學跳舞，再參加咗Tai Tsz當時嘅double dutch隊，就發現哩樣嘢比起傳統跳繩好有挑戰性喎，之後就兩邊同時兼顧啦。」眼見Tai Tsz在「1on1 battle」賽事奪冠，亦得知他滿有熱誠推廣這個運動，Ted Ma亦覺得double dutch的多元化和型格特質能受大眾接受，便與Tai Tsz組隊「Ropssy」。

連成一線

去年九月，Tai Tsz和Ted Ma便決定成立香港交互繩總會，以總會名義向學校推廣這個運動，決心推動double dutch發展。一直以來，他倆見證着朋輩隊友離場，Tai Tsz對此深有體會，令他醉心作推廣工作，「開頭有一班前輩帶我入嚟哩個圈，但好多都係放重心喺傳統跳繩，再慢慢見證住好多人離開，我就覺得好心痛，既然自己咁鍾意哩樣嘢，同埋有返啲成就，就好想令更多人加入哩度，就成立咗哩個總會」。

疫情漸見明朗，「Roppsy」亦多了演出的機會，加上他們努力的宣傳和推廣，令double dutch 有更多人認識。早前，他們登上了電視台節目《一Take過》的演出，除了基本的邊跳舞邊跳繩外，他們加入了打空翻的元素，令觀眾嘆為觀止，更增加了double dutch的多樣性，Ted Ma說：「double dutch唔單止係一個運動發展，係連埋其他運動嘅發展，例如Breaking(霹靂舞)、Tricking(極限特技)，外國甚至見到邊跳邊玩劍球㖭，你可以見到哩樣運動嘅可能性係幾咁大！」

穿針引繩

「永遠做第一個起頭嘅人好慘，好似畀之後嘅人享受咁，但如果永遠諗到咁現實，好多嘢都唔會做到！」隊員豬仔說。「Ropssy」早期只有四人，單純以普通舞蹈為主，想不到他們的獨特性和理念得人認同，更有人主動要求加入double dutch 推廣，願意一同去追夢。當中有素未謀面的，有一面之緣的，更有昔日的隊友，他們的身懷絕技令「Ropssy」 更引人注目，又為double dutch 注入更多新的靈魂。

舞動跳躍

Sony（Bboy-soulgreen）是一名Breaking舞者，更是2024巴黎奧運香港霹靂舞代表隊成員之一，經友人介紹下輾轉留意到「Ropssy」，便「膽粗粗」向他們招手，了解這個有趣的運動。Sony分享說：「跳舞跳咗十六年，有時你喺一個文化太耐都想有個新嘅衝擊，一玩就發現兩樣嘢合埋好夾，跳住繩咁跳舞係可以刺激我嘅跳舞靈感。」他又補充指，雖然自己的時間表較密，又要練習breaking，又要抽空與「Ropssy」練習，但種種辛苦都是為了單純的熱愛，「哩班人個個都好top，哩個運動亦咁有潛質去發展，就係因為咁，我好想話畀更多人知double dutch嘅發展幾咁闊，佢係值得畀人認識嘅」。

起初與Tai Tsz是「網友」的豬仔，因《一take過》的火花便加入了「Ropssy」，雖然他是Tricking 強者，但對double dutch 毫無概念，而且跳舞更是自己的弱點，惟接觸過它後，沒想過它會為自己的專項帶來了衝擊，豬仔說：「原來佢同Tricking嘅動作係match嘅，更可以造出更多令觀眾嘩然嘅動作。」豬仔加入了「Ropssy」只有一年左右，本身需要主理Tricking 的事務，但他認為推動double dutch ，就如推動Tricking 無異，同樣是憑着滿腔熱誠，「如果諗太多利益就會好快無咗熱誠，加入哩度去玩哩個運動，或多或少都係受Tai Tze感動嘅， 原來double dutch 喺帶到畀我一啲突破」。

相輔相成的情意結

阿肥和Wingki跳繩有十年，其中Wingki曾是港隊成員，二人本來放棄了跳繩，但出奇的緣份，再次被繩子拉回到圈中，捨棄過才知道自己想要什麼。阿肥是最新加入「Ropssy」的成員，本身他有自己所屬double dutch 隊，但同伴全都離開跳繩圈，遂打算不再參加比賽，在Tai Tze和Ted Ma的鼓勵下，加上隊友的力量，他便決定重回double dutch圈，「除咗佢哋兩位嘅熱誠打動到我之餘，最重要係Sony嘅態度，佢係一個B-boy強者都肯去學新嘢，就令我更加想留喺度」。回望過去短時間放棄double dutch，阿肥認為放棄嗜好是件痛苦的事，人生便會變得空虛，「餓唔死就得㗎啦，做人剩係返工我真係會好無心機」。

前跳繩港隊運動員的Wingki，因傷而無奈退出港隊，更在赴台升學前沒有再跳繩，但沒想過又有機會讓她做跳繩教練，更讓她接觸了double dutch，她說：「都係因為啲學生搞workshop我就接觸到double dutch，可能因為我有跳舞底子，就發現自己對哩種運動有興趣啦。」回港後，他便雀躍地與Ted Ma相約練繩，誰不知竟與他們一拍即合，便立馬組成「Ropssy」，利用舞蹈為double dutch鑽研更多；同時間由傳統跳繩轉向double dutch她亦有所得着：「其實無論傳統跳繩定double dutch，跳繩哩樣嘢係好多元化，只不過係大家口味唔同啫。」

永不停止地跳躍

阿肥說：「我覺得自己為double dutch係賭上咗㗎，就算最後唔成功，但起碼要努力去做囉！」為了配合「Ropssy」的團練，阿肥放棄了晚間的車房工作，深知自己能力有限，他繼續努力苦練，盡力做好自己在團隊上的崗位，「可能哩啲動力嚟自我玩開偏門運動啦，例如街頭健身、越野電單車、彈網等，就會有一種想做畀人發現到自己，發現到個運動咁，我就會想好好進步，令到團隊成為double dutch嘅icon」。

「哩樣運動的好玩之處係，好多人圍住一條繩跳，係一個好好嘅連繫。」Wingki說。雖說double dutch看似難度高，女生似是難以駕馭，所以她一直努力鑽研舞技、繩技，以身作則告訴大家，女生是這個運動的耀眼之處，「哩個運動會感覺自己係表演者而唔係運動員，我諗哩個部份就係好考自己肯唔肯去行出comfort zone咁，做返自己，大概就好似哩種運動想帶出嗰種包容同多樣性嘅訊息」。

Text：Dorz 
Photo：Mr C、受訪者提供 
Design：Yvonne
原文刊於《運動版圖》2023年3月號