魏賡 – 再尋突破

By nicolekwok, 18 一月, 2023

魏賡 – 再尋突破

打開魏賡的Instagram頁面，個人介紹寫著「現狀打破」。他在2017年投入全職訓練，並在渣馬成為第一名衝線的香港跑手，其後2018年再次渣馬奪冠、代表香港跑亞洲錦標賽、成立「賡班」開始教跑班，種種經歷都顯示他不斷走出舒適圈，按部就班朝目標前進的決心：「那時會諗，若跑唔到奧運標準時間，沒有體院或跑會資助嘅時候，我要點樣延長自己嘅跑步生涯？」成為跑步教練，以及加入TeamSOLO，對他來說都是打破現狀，追求突破的新嘗試。

IG: ngankang
全馬PB：2:26:15 ( 2019年德國柏林馬拉松)
半馬PB：1:09:46 (2018年澳洲黃金海岸馬拉松)

性格構造命運

說做教練和加入跑團是新嘗試，但對香港跑手來說卻是最理所當然的出路：「我想繼續跑，唔夠資助嘅情況下，就要諗長遠嘅方法。以前我同好多跑手一樣都係自己訓練，就算曾經加入香港馬拉松集訓隊，我哋都好少時間一齊練，以上次跑亞錦賽為例，由選拔到確認代表名單後去比賽，只得一個多月時間去準備。2017年體院曾請來日本教練村尾慎悅為我哋集訓，但海外集訓和比賽大多要自費，我跟咗半年就因為負擔唔到而無再跟了。」

喜歡挑戰和不怕試新事物的性格，令魏賡很快決定成立「賡班」：「疫情期間我教嘅地區跑班要暫停，但有些學生仍想繼續上堂，我就試下自己搞跑班睇下得唔得，到而家每星期恆常班都有三班、每次有十多二十人上堂，再加上有其他公司班及私人班，仲要配合我自己嘅訓練課表，時間分配都仲夾到，好充實啊！」緊密的時間表令他更認真思考訓練安排的意義：「一個人嘅訓練可以好隨意， plan咗都可以因應其他原因去調節去改，例如哩兩晚教班有啲攰就skip咗個重訓，或者睇自己感覺去調整，但成日會自己唔夠動力練，尤其是哩幾年無乜比賽無乜目標，令我個方向有啲迷失。」他自言喜歡寓賽於練，這兩三年香港的賽事大減，令他更蠢蠢欲動，2022年中才加入TeamSOLO，為澳洲黃金海岸馬拉松作準備：「一個人練會比較悶，一班人嘅氣氛同埋推動力都好啲，係開心啲嘅。而且喺我自己跑班我係為學生提供訓練指引嘅角色，TeamSOLO入面我唔使自己計劃訓練，感覺好唔同。」

以前他就有和啟樂一齊練習，對跑團的構思早有共識，就是集合能力相當的跑手一起去練習，大家都有共同目標去進步，「我覺得有良性競爭係更加好。哩種既個人又團體嘅方式幾得意，即係比賽時我哋係各自參加個人賽事，但就算練唔同Program都有嘢可以交流同夾到一齊試新嘅訓練模式，例如我哋一齊去做Strength & Conditioning，以前我未試過哩種體能訓練，大家每星期都抽時間去做，畀自己適應新嘅訓練模式。」

跑出訓練舒適圈

自己一個人的訓練都跑到渣馬冠軍，要改變訓練模式無疑更需要勇氣，但魏賡對轉變接受得很淡然：「每星期有兩日做S & C，我就減少跑量，等肌肉適應返多啲協調同彈跳嘅訓練。以前可能一星期跑十二至十三課，而家就大概跑十至十一課，整體里數都減少咗。」其後他去跑黃金海岸馬拉松以2:34:10完成，又忽發奇想參加了從未跑過的香港山路錦標賽，年尾首次跑臺北馬拉松以2:29:19作結，接連的比賽反映他想透過賽事驗收新的訓練模式：「本來想跑天水圍十公里，但比賽取消咗，便試下去跑山賽，當日跑咗差唔多三千米爬升，路線有上落，並唔係單靠心肺功能就OK，用嘅肌肉多咗、體能要求都多咗，如果我無做S & C訓練嘅話我諗我應該頂唔到返終點線，因為我中途啲肌肉已經抽咗幾下！」這次體驗他認為比路賽更辛苦，每個Check point都要飲一公升水和食補充食品，「今次咁特別嘅比賽經驗我都當training啦，會對我之後練返路跑馬拉松嘅信念更堅定。」

嘗試越野跑，嘗試跑團訓練，只因他認為仍有需要累積更多不同經驗和從中學習，「我覺得唔可以淨係用同一個模式train自己，會悶之餘太過單一，好容易失去樂趣，嘗試咗而家哩個模式之後多咗好多樂趣！」

魏賡仍然不改當初勇於突破的個性，但亦坦言要平衡跑班教練和自己的訓練課表，時間管理有點吃力，所以現時會專注短期的比賽計劃，跑完臺北馬拉松接下來是香港的渣馬，再之後會考慮去跑就近的日本馬拉松賽事，期望慢慢靠近香港代表的選拔標準，可以再次代表香港出戰亞運及亞錦賽。