尹焯熙 – 跑離迷茫

By nicolekwok, 18 一月, 2023

尹焯熙 – 跑離迷茫

在香港做長跑運動員，好似總是離不開掙扎與迷失的階段。跑了七年多，曾代表香港出戰2019年亞洲馬拉松錦標賽，尹焯熙坦言2022年是最掙扎的一年：「原定計劃同隊友一齊去澳洲黃金海岸比賽，點知我拗柴骨裂，休息咗一個多月，後來又輪到腰痛，令到我哩一年嘅訓練時間好唔穩定。」他一直都習慣一個人練習，剛好這一年的團練經驗成為他繼續跑的動力來源。

IG: cheuk_x_hei
全馬PB：2:27:26（2019年德國柏林馬拉松）
半馬PB：1:08:20（2020年丸龜國際半程馬拉松）

一個人又不止一個人

一個人的獨自訓練，應該是很多跑友的經驗：「自己一個跑嘅時候，時間地點自己ok就得，唔使同人夾。不過亦都會比較保守唔會去盡，會自己就住，例如覺得狀態不佳嘅時候會收慢啲跑。」2022年他加入TeamSOLO一齊練了大概十個月，對他來說團隊練習頗有啟發：「自己跑可能就只會專注喺自己度，同佢哋一齊跑就會多一啲唔同嘅啟發。我哋有兩個仲讀緊書嘅隊友，佢哋跑短距離會快啲，我咪跟住佢哋跑快啲；調返轉我哋跑長距離嘅時候表現會穩定啲，就輪到佢哋嘅跟住我哋跑了。」他笑言，跑步的人見到前面有人就會很自然想追，所以會不自覺地跑快了：「明明起跑前大家講定咗一個速度，起跑之後就愈跑愈快，都唔係原本講嘅速度！」

所以在團隊中，他有種既是一個人又不是一個人的感覺，對他是頗新奇的體驗。「無論我哋係咪一個團隊咁樣練習，最後我哋都係為咗自己跑，跑到咩時間都係靠自己跑返嚟，係屬於自己。」和隊友之間既會互相支持鼓勵，亦是競爭關係，對他來說是特別的推動力，亦都相信會令大家都有進步：「有目共睹嘅係香港整個跑界都係進步緊，對跑手嚟講係有正面嘅幫助！」

整體進步的動力

在跑步這項「個人」運動上建立團隊概念，尹焯熙也花了點時間去模索：「最初要夾時間和地點練習會好唔習慣，一個禮拜要夾到兩三日一齊練都幾難，但好慶幸隊友嘅態度都好正面，願意分享自己嘅訓練方法，令大家有良性競爭嘅氛圍。」他認為跑步的團練始終和團隊運動不同，並非靠團隊精神和合作去贏，所以更重要的是團練的過程：「成日會有人話盡力就得、冇後悔就得，但事實係殘酷嘅，快同慢喺時間上已經顯示咗你有幾努力，而且好多時努力唔一定會有成績。當付出同收穫唔成正比嘅時候，訓練難免會有啲灰心氣餒，但喺練習過程當中都會有啲唔同嘅得著，就係隊友會激勵到我，對我嚟講都重要。」

他說自己需要看別人跑，「有時見到其他跑手去比賽，跑到唔錯嘅成績，我都會諗我要再努力啲——大家都係香港人，點解人哋做到而我做唔到呢？所以對我嚟講睇人哋跑係最好嘅激勵方法。」這令他想起幾年前他跟過的一位教練，他說的話當時他聽了不太明白，現在卻深有同感：「我哋冇辦法用錢買到表現，喺同一個環境之下無論幾有錢大家都係公平嘅，就算有錢有資源可以做多啲唔同訓練，但都係要好努力好專心去跑先至會有好嘅結果，並唔係有錢就可以買到快一分鐘。」也因此，他心目中的「對手」一直都是自己：「與其同人比較，其實大多時候都係同自己比較，諗下我仲可以點努力？點樣快過自己嘅PB？」近年他除了練習瑜伽，亦有做Strength & Conditioning體適能訓練，正是源於這種覺悟：「因為除咗要訓練自己提升能力，更加重要嘅係隨著年紀增長我個狀態都會跌嘅，我要諗點樣維持身體狀態。馬拉松唔止係一個兩個鐘頭嘅運動，而係要身體同精神夠強先可以做得到及做得好！」