有故事的細路 - 序
我受委托，為一班「有故事的細路」提供越野跑訓練。但過程一點都不容易，用傳統的課堂模式，根本連管理課堂都未做得到，更不要說是訓練。所幸，老友正生書院校長給了我一點啟發。
在一次難得的機會下，我因為奪得某某賽事的冠軍，而獲邀到一間高級餐廳用膳。那間餐廳的規矩比越野跑指定裝備還要多！一定要穿西裝、打領呔、不准玩手提電話。餐廳想塑造高尚的格調來迎合上流社會人士的需要。但對於我這些基層人士來講，實在是很拘束，很不舒服。
我難得在晚宴上遇到老友正生校長，就有如他鄉遇故知，立即坐埋一枱。藉此難得機會，我更向正生校長請教如何教壞細路。更正，是教「壞細路」。
校長叫我拿出手機來拍照。
我：「校長，唔得㗎！唔俾玩手機」
校長：「唔怕，喺枱底影咪得囉。」
我：「校長，有人望住，我好緊張。」
校長：「我幫你睇水，佢擰轉面我地即刻影⋯⋯係機會啦！」
刷📸
我：「大鑊，有聲嘅，唔記得較靜音。」
校長：「無事，佢聽唔到，快啲收埋，一陣Send返俾我！
點呀？係咪好過癮？」
這一晚，我感覺自己回到仍然是「壞細路」的年代，重新感受那種對違規的慾望、新鮮感和快感。
社會上，有一班曾被警司警戒的細路，被label為「壞細路」，但透過接觸，發現其實他們並不是壞，只是每人都有他的故事。自從接觸越野跑開始，令他們尋回自己的價值，甚至建立價值，從此改變。要教「壞細路」，必先了解他們做錯事的動機是出自成長與生俱來的好奇心，表達自己的立場融入他們，製造空間讓他們釋放，與他們一起走，適當時候引領他們回正途。
我上了非常寶貴的一課。
///
由我的故事開始，每個月會和大家分享這班細路的故事。
黃浩聰 / 香港越野跑運動員
每個細路都有佢嘅故事，在《運動版圖》的專欄《青聰細路》會由我自己「細路」時嘅故事開始，之後每期再同大家分享一位小朋友嘅越野跑之路。
